काठमाडौं । प्रधानमन्त्री निवास बालुवाटारमा सत्ता साझेदार दलहरूको बैठक सुरु भएको छ । प्रधानमन्त्रीको सचिवालयका अनुसार बैठकमा पछिल्लो राजनीतिक परिस्थिति र समसामयिक विषयमा छलफल भइरहेको छ ।
बैठकमा भिजिट भिसा प्रकरण, आजको प्रतिनिधिसभाबाट पारित गरिने विनियोजन विधेयक २०८२, संसदीय प्रक्रियासम्बन्धी विषयहरू तथा संक्रमणकालीन न्यायको कामकारबाहीबारे विशेष छलफल हुने जनाइएको छ ।
बैठकमा प्रधानमन्त्री एवं नेकपा (एमाले) अध्यक्ष केपी शर्मा ओली, नेपाली कांग्रेसका सभापति शेरबहादुर देउवा, लोकतान्त्रिक समाजवादी पार्टीका अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ र जनमत पार्टीका अध्यक्ष डा. सीके राउत सहभागी छन् ।
सत्ता साझेदार दलहरूबीच समन्वय, साझा धारणा र आगामी रणनीतिका विषयमा निर्णय लिन बैठक महत्वपूर्ण मानिएको छ ।
