काठमाडौँ।नेकपा (एमाले) का वरिष्ठ उपाध्यक्ष ईश्वर पोखरेलले पार्टीलाई लोकतान्त्रिकीकरण गर्दै सुदृढ र लोकप्रिय बनाउने श्रेय अध्यक्ष केपी शर्मा ओलीलाई जाने दाबी गरेका छन्।
गणतन्त्र दिवसको अवसरमा राष्ट्रिय समाचार समितिले आयोजना गरेको तस्बिर प्रदर्शनीको अवलोकनपछि पोखरेलले भने, “अध्यक्ष ओलीको नेतृत्वमा पार्टी सही ढंगबाट लोकतान्त्रिक प्रक्रियामा अघि बढ्दा एमाले आज देशकै सशक्त र लोकप्रिय पार्टी बन्न सफल भएको हो।”
लोकतान्त्रिकीकरण प्रक्रिया र विधानको प्रावधान
पोखरेलले पार्टीमा बहुपदीय व्यवस्था, ७० वर्षको उमेर सीमा र नेतृत्वको दुई कार्यकालसम्बन्धी प्रावधान विधान महाधिवेशनबाट पारित भएको जानकारी दिए। उनले भने, “यी विषयमा अन्तिम निर्णय महाधिवेशनबाटै हुने भएकाले अहिले टिकाटिप्पणी गर्ने बेला होइन।”
उनले नेतृत्वमा लोकतान्त्रिक अभ्यासलाई स्थापित गर्न ओलीको अग्रणी भूमिका रहेको उल्लेख गर्दै भने, “लोकतान्त्रिकीकरणको अभ्यास पार्टी अध्यक्षकै विचारबाट निर्देशित हुँदै आएको हो।”
एमालेबाट समाजवादी पार्टीमा गएका केही नेताहरूलाई उमेर हदले फर्कन अवरोध पुगेको उनको भनाइ थियो। “महाधिवेशनको निर्णयलाई हामी सबैले बोक्नुपर्छ,” पोखरेलले जोड दिए।
कांग्रेस–एमालेबीचको सहकार्य र प्रतिस्पर्धा
पोखरेलले नेपालको राजनीतिक परिवर्तनमा कांग्रेस र एमालेबीच विगतमा पटक–पटक सहकार्य भएको उल्लेख गरे। उनले २००७ सालको प्रजातन्त्र स्थापनादेखि २०६२/६३ को आन्दोलन, संविधानसभाबाट संविधान जारी गर्ने सम्मका प्रमुख मोडमा दुवै पार्टीबीच सहकार्य भएको स्मरण गराए।
तर, उनले कांग्रेस र एमाले प्रतिस्पर्धी शक्ति भएको स्पष्ट गर्दै भने, “राष्ट्रिय संकटमा सहकार्य हुन सक्छ, तर यी दुई शक्ति मूलतः प्रतिस्पर्धी हुन् भन्ने बुझ्न जरुरी छ।”
संसद्को गतिरोधबारे धारणा
संसद्मा भइरहेको गतिरोधबारे पोखरेलले गृहमन्त्रीका विरुद्ध प्रमाण नहुँदासम्म राजीनामा माग गर्नु अन्यायपूर्ण भएको बताए। उनले भने, “अनुसन्धानका लागि बयान लिनुलाई मन्त्री राजीनामाको आधार बनाउनु अनुचित हो। यदि दशी प्रमाण भेटिएको भए कुरा अर्कै हुन्थ्यो।”
वाम एकता र व्यावहारिकता
वामपन्थी एकताको सन्दर्भमा पोखरेलले ‘नाम वामपन्थी, काम अर्कै’ हुने प्रवृत्तिको आलोचना गरे। उनले भने, “वास्तविकतामा आधारित ‘कामपन्थी’ तालमेल हुनु जरुरी छ। केवल नाराका लागि वाम एकताको चर्चा गर्नु व्यर्थ छ।”
उनको भनाइमा, पार्टीको विचार, कार्यशैली र व्यवहार एकअर्कासँग मेल खाए मात्र एकता सम्भव हुन्छ।
