काठमाडौँ । नेपाली कांग्रेसका महामन्त्री विश्वप्रकाश शर्माले आफू सर्वोच्च शिखर सगरमाथा आरोहणका लागि मापदण्डमा परे पनि यसै सिजनमा आरोहण गर्ने पर्याप्त योग्यता र तयारी नपुगेको बताएका छन् ।
पर्यटन विभागबाट आरोहण अनुमति लिएको समाचार सार्वजनिक भएपछि शर्माले बिहीबार सामाजिक सञ्जालमार्फत आफ्नो योजना र हालको अवस्थाबारे जानकारी गराएका हुन्।
शर्माले आफू यसपटक सगरमाथा आधार शिविर (बेसक्याम्प) सम्म पुग्ने ‘सेमिफाइनल’ लक्ष्य लिएर काठमाडौंबाट हिँडेको र सो लक्ष्य पूरा भइसकेको बताएका छन् ।
हाल उनी आधार शिविरमा आरोहणका लागि प्रशिक्षण लिइरहेको उल्लेख गर्दै यस सिजनमा सगरमाथा चढ्न तयारी नपुग्ने बताएका छन् ।
उनले भनेका छन्-
१) यसपालि सेमिफाइनलसम्म । अर्थात सगरमाथा बेसक्याम्प सम्म, भनेरै हिँडेको थिएँ काठमाडौबाट । त्यो म पुगिसकें, सेमिफाइनल पूरा भएको छ ।
२) अहिले म `फाइनल´ अर्थात सगरमाथा आरोहणका लागि बेसक्याम्पमा ट्रेनिङ लिइरहेको छु । ६ हजार १ सय ४५ मिटर उचाइको लोबुचे हिमाल आरोहण गरिसकेको हुँदा, सगरमाथा चढ्न पाउने मापदण्डमा म पर्छु र त्यही मापदण्ड बमोजिमको अनुमति पत्र पनि म सँग छ । त्यसैले अहिल्यै / आजै चढ्न लागे कि भन्ने लागेर कसैले लेख्नु अन्यथा पनि होइन ।
३) तर सगरमाथा आरोहण गर्न सोही अनुरुपको जरुरी प्रशिक्षण र समय चाहिन्छ । सामान्यतया आरोहीलाई ४२ दिनको प्याकेज बनाउने गरिन्छ र प्राय मे महिनाको 29 तारिख ( जेठ १५/१६ तिर) अर्थात `सगरमाथा दिवस´ का दिन आरोहण प्राय क्लोज गरिन्छ । यद्यपि शिखर नजिक पुगेकाहरुले त्यसको केहिदिनसम्म पनि आरोहण गर्न पाउँछन् नै ।
४) म भर्खर केहिदिन यता मात्र बेसक्याम्प पुगेको हुँदा, न समय पर्याप्त पुगेको छ, न म सँग सगरमाथा आरोहणका लागि जरुरी प्रशिक्षण छ । तर प्रशिक्षण लिँदै चाहिँ छु । आखिर यो प्रशिक्षण फाइनल भिड्नै परेका बेला त काम लाग्छ नै । अथवा लोबुचे हिमाल भन्दा थोरै माथी पुग्न पनि त यो प्रशिक्षणले सघाउला । हो, त्यति चैं हुनसक्छ ।
अहिलेलाई यत्तिमात्र भनौं- सगरमाथा बेसक्याम्प पुग्दैमा सगरमाथा पुगिन्न । इच्छाएका कुरा हासिल गर्न सो बमोजिमको योग्यता पनि हुनुपर्छ, अहिलेनै म सँग त्यसका लागि पर्याप्त योग्यता छैन ।
