काठमाडौं । नेपाली कांग्रेसको नीति, अनुसन्धान तथा प्रशिक्षण प्रतिष्ठानले भैरहवामा दुई दिने राष्ट्रियस्तरको प्रशिक्षण कार्यक्रम आयोजना गर्दैछ। कार्यक्रममा देशभरका १६५ क्षेत्रीय सभापतिहरू सहभागिता जनाउन भैरहवा पुगेका छन्।
उद्घाटन समारोहमा पार्टी सभापति शेरबहादुर देउवाले सम्बोधन गर्दै प्रशिक्षणको औपचारिक सुरुवात गर्नेछन्। कार्यक्रममा क्षेत्रीय सभापतिहरूसँगै क्षेत्रीय प्रशिक्षण प्रतिष्ठान प्रमुख, एउटै निर्वाचन क्षेत्र भएका जिल्लाका सभापति र उपसभापतिहरू समेत गरी ३३० भन्दा बढी कांग्रेस नेता तथा कार्यकर्ता उपस्थित रहनेछन्।
प्रशिक्षणको मुख्य उद्देश्य पार्टीलाई संस्थागत रूपमा बलियो बनाउने विषयमा छलफल गर्नु हो। उद्घाटनपछि कांग्रेसले हालसम्म गरेका नीतिगत सुधार र भौतिक पूर्वाधारका कामको समीक्षा प्रस्तुत गर्नेछ। साथै, पार्टीको आगामी महाधिवेशन, क्रियाशील सदस्यता, आमनिर्वाचन लगायतका महत्त्वपूर्ण विषयमा विचार विमर्श हुनेछ।
कार्यक्रममा उपसभापति एवं केन्द्रीय नीति, अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्का, महामन्त्रीद्वय गगनकुमार थापा र विश्वप्रकाश शर्मा, पूर्वमहामन्त्रीहरू कृष्ण सिटौला, विमलेन्द्र निधि, बालकृष्ण खाण, रमेश लेखक लगायतका नेताहरू सहभागी हुनेछन्।
तर, वरिष्ठ नेता डा. शेखर कोइराला भने कार्यक्रममा सहभागी नहुने भएका छन्। उनका सहयोगी दिनेशचन्द्र थपलियाका अनुसार, चार दिनअघि पार्टी केन्द्रीय कार्यालयबाट फोन गरी कार्यक्रममा निमन्त्रणा गरिएको थियो, तर कोइरालाको पूर्वनिर्धारित कार्यसूची भएकाले उनी सहभागी नहुने भएका हुन्।
प्रशिक्षणमा सहभागीहरूले आफ्ना क्षेत्रका अनुभवहरू आदानप्रदान गर्नाका साथै वर्तमान सरकारको कामकाजबारे आलोचनात्मक सुझाव राख्ने अवसर पाउनेछन्। सरकारका दुई मन्त्रीहरूले ती प्रश्नहरूको जवाफ दिने कार्यक्रम पनि रहेको छ।
यसअघि कांग्रेसले माघ २२ र २३ गते पोखरामा ७७ वटै जिल्लाका सभापति, प्रशिक्षण शाखा प्रमुख तथा उपसभापतिहरूका लागि प्रशिक्षण तथा अभिमुखीकरण कार्यक्रम गरेको थियो।
