मस्को । रुसी जेलमा १९ वर्षको जेल सजाय भोगिरहेका पुटिनका सबैभन्दा ठूला प्रतिद्वन्द्वी एलेक्सी नाभाल्नी पछिल्लो ६ दिनदेखि बेपत्ता छन् । एलेक्सीको नाम अब उनलाई राखिएको जेलमा रहेका कैदीहरूको सूचीबाट हटाइएको बिबिसीले उल्लेख गरेको छ ।
एलेक्सीका वकिलले उनलाई कहाँ सारिएको हो भन्नेबारे प्रशासनले कुनै जानकारी नदिएको बताएका छन् । वास्तवमा रुसमा अर्को वर्ष राष्ट्रपतिको निर्वाचन हुन लागेको छ । नभाल्नीसँग सम्बन्धित व्यक्तिहरूले उनको बेपत्तालाई यी चुनावसँग सम्बन्धित बताएका छन् । पुटिन आफ्ना सबैभन्दा ठूला प्रतिद्वन्द्वी नाभाल्नीको खबर आम जनतासम्म पुग्न चाहँदैनन् ।
नाभाल्नीका वकिलका प्रवक्ता यार्मिशले भने- उनको यसरी बेपत्ता हुनु चिन्ताको विषय हो किनभने केही दिन अघि मात्रै जेलमा उनको स्वास्थ्य निकै बिग्रिएको थियो । उनी भुइँमा लडिरहेको अवस्थामा फेला परेका थिए । उनलाई जेलमा खाना खुवाइएको छैन । उनलाई भेन्टिलेसन नभएको कक्षमा राखिएको थियो । स्वास्थ्य बिग्रिएपछि भोकले बेहोस भएजस्तो लाग्थ्यो ।
ह्वाइट हाउसले पनि यस विषयमा चिन्ता व्यक्त गरेको छ । ह्वाइट हाउसका प्रवक्ता जोन किर्बीले भने– नाभाल्नीलाई तत्काल रिहा गरिनुपर्छ । उनलाई जेल पठाउनु गलत थियो । हामी मस्कोस्थित हाम्रो दूतावाससँगको सहकार्यमा यस विषयमा थप जानकारी सङ्कलन गरिरहेका छौं ।
बीबीसीका अनुसार नभाल्नी पछिल्ला केही समयदेखि अदालतको सुनुवाइमा पनि उपस्थित छैनन् । यसअघि उनी भिडियो लिंकबाट जोडिन्थ्यो । नाभाल्नीलाई यसै वर्षको अगस्टमा १९ वर्षको जेल सजाय सुनाइएको थियो । उनलाई चरमपन्थी समुदायको सिर्जना र प्रवर्द्धन गरेकोमा दोषी ठहरिएको थियो । यसअघि उनलाई भ्रष्टाचार र ठगी मुद्दामा १२ वर्ष कैद सजाय सुनाइएको थियो । नाभाल्नीले सबै आरोप अस्वीकार गर्दै आएका छन् ।
