न्युजिल्यान्डका प्रधानमन्त्री क्रिस्टोफर लक्सनले बुधबार आगामी नोभेम्बर ७ तारिखमा आम निर्वाचन हुने घोषणा गर्नुभएको छ । निर्वाचनको मिति सार्वजनिक गर्दै उहाँले अर्थतन्त्र सुधार र अपराध नियन्त्रणमा आफ्नो सरकारको उपलब्धिलाई मुख्य आधारका रूपमा प्रस्तुत गर्नुभएको छ ।
प्रधानमन्त्री लक्सनले पत्रकारहरूसँग कुरा गर्दै निर्वाचनको मिति छनोटमा खेलकुदप्रेमी न्युजिल्यान्डको क्यालेन्डरले पनि केही भूमिका खेलेको बताउनुभयो । अल ब्ल्याक्सले अस्ट्रेलियाविरुद्ध घरेलु मैदानमा खेलेको खेल सकिएको करिब एक महिनापछि निर्वाचन तय गरिएको उहाँको भनाइ थियो ।
गत महिना सार्वजनिक भएको करदाताहरू युनियन/क्युरिया सर्वेक्षणअनुसार विपक्षी लेबर पार्टीले ३१.६ प्रतिशत मत समर्थनसहित लक्सन नेतृत्वको कन्जर्भेटिभ नेसनल पार्टीलाई ३०.० प्रतिशतमा हल्का अग्रता लिएको देखिएको छ । यद्यपि, सोही सर्वेक्षणले गठबन्धन साझेदार दलहरूको समर्थनका कारण लक्सन नेतृत्वको सरकार अझै सत्तामा रहने सम्भावना रहेको सङ्केत गरेको छ ।
प्रधानमन्त्री लक्सनले आफ्नो सरकारले ‘आधारभूत कुराहरू ठिक पार्ने योजना’ पूरा गर्ने प्रतिबद्धता दोहोर्याउनुभयो । उहाँले पदभार सम्हाल्दा देश गलत दिशातर्फ गइरहेको र विगत दुई वर्षमा अवस्था सुधार्न कडा मेहनत गर्नुपरेको उल्लेख गर्नुभयो । उहाँका अनुसार व्यापार र उपभोक्ताको विश्वास बढ्दो क्रममा छ, निर्माण तथा पूर्वाधार क्षेत्रमा गति आएको छ र निर्यातले उल्लेखनीय रूपमा राम्रो प्रदर्शन गरिरहेको छ ।
प्रधानमन्त्रीले अघिल्लो सरकारको कार्यकालमा मुद्रास्फीति करिब ७ प्रतिशतबाट घटेर ३ प्रतिशतभन्दा कममा झरेको दाबी गर्नुभयो । साथै, भारतसँग भएको स्वतन्त्र व्यापार सम्झौतालाई महत्त्वपूर्ण उपलब्धिका रूपमा उल्लेख गर्दै त्यसलाई कार्यान्वयन गर्ने कानून यसै वर्ष पारित हुने अपेक्षा व्यक्त गर्नुभयो ।
अपराध नियन्त्रणका सवालमा पनि प्रधानमन्त्री लक्सनले आफ्नो सरकारको कामको प्रशंसा गर्नुभयो । उहाँका अनुसार प्रहरी सडकमा बढी देखिन थालेका छन्, अपराधका सिकार हुनेको सङ्ख्या ३८ हजारले घटेको छ, युवा अपराध १६ प्रतिशतले कम भएको छ र सशस्त्र छापाको घटना ८५ प्रतिशतले घटेको छ ।
यसबीच विपक्षी लेबर पार्टीका नेता क्रिस हिप्किन्सले भने प्रधानमन्त्री लक्सनले अपेक्षाकृत ढिलो निर्वाचनको मिति रोज्नुको कारण आफ्नो पद जोगाउने निराश प्रयास भएको आरोप लगाउनुभयो । सन् २०२३ मा जासिन्डा अर्डर्नको राजीनामापछि छोटो समय प्रधानमन्त्री रहनुभएका हिप्किन्सले न्युजिल्यान्डमा सामान्यतया अक्टोबरमा निर्वाचन हुने गरेको स्मरण गराउँदै यसपटक नोभेम्बरमा सारिनु अर्थपूर्ण भएको टिप्पणी गर्नुभयो ।
हिप्किन्सले आफ्नो पार्टीले सकारात्मक एजेन्डासहित चुनावी अभियान चलाउने बताउनुभयो । उहाँले नेसनल पार्टीले अझ बढी दोषारोपण, बहाना र कटौतीको राजनीति गरिरहेको आरोप लगाउँदै न्युजिल्यान्ड त्योभन्दा राम्रो विकल्पको हकदार रहेको धारणा राख्नुभयो ।
न्युजिल्यान्डमा पछिल्लो आम निर्वाचन सन् २०२३ को अक्टोबर १४ मा सम्पन्न भएको थियो ।
