काठमाडौं । प्रतिनिधि सभा सदस्यतर्फ धनुषा क्षेत्र नम्बर १ मा प्रतिस्पर्धा गरिरहेका राष्ट्रिय स्वतन्त्र पार्टी (रास्वपा)का उम्मेदवार किशोरी साह कमलको उम्मेदवारी अन्ततः खारेज गरिएको छ। निर्वाचन प्रक्रियाको अन्तिम चरणमा पुगेको बेला आएको यो निर्णयले क्षेत्रीय राजनीति तरंगित भएको छ।
निर्वाचन आयोगका कार्यवाहक प्रमुख रामप्रसाद भण्डारीका अनुसार उम्मेदवार साह बैंक तथा वित्तीय संस्थाको कालोसूचीमा रहेको आधिकारिक प्रमाण आयोगमा पेश भएपछि उनको उम्मेदवारी अयोग्य ठहर गरिएको हो। प्रचलित कानुनी व्यवस्थाअनुसार कालोसूचीमा नाम समावेश भएका व्यक्तिले उम्मेदवार बन्न नपाउने प्रावधान छ।
धनुषा–१ मा अब प्रतिस्पर्धा नेकपा (एमाले) का रामचन्द्र मण्डल, नेपाली कांग्रेसका राम पलटन साह र नेकपाका मातृका प्रसाद यादवबीच केन्द्रित हुने भएको छ। अन्तिम समयको यो निर्णयले मतगणितमा प्रत्यक्ष प्रभाव पार्ने आँकलन गरिएको छ। बिहीबार हुने निर्वाचनअघि आएको आयोगको कदमले दलहरूलाई उम्मेदवार छनोटमा थप सतर्क रहनुपर्ने सन्देश पनि दिएको छ।
