काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले विवादित अडियो प्रकरणबारे पार्टीको केन्द्रीय अनुशासन आयोगलाई लिखित जवाफ बुझाएका छन्। उनले आफूमाथि लगाइएका आरोप अस्वीकार गरेका छन्। अब आयोगले अडियोको स्रोत पहिचान, प्रमाण सङ्कलन र घटनाको वस्तुनिष्ठ अनुसन्धानलाई अघि बढाउने भएको छ। एक महिलासँग आपत्तिजनक अभिव्यक्ति दिएको र धम्कीपूर्ण भाषा प्रयोग गरेको सुनिने अडियो सार्वजनिक भएपछि सुनार विवादमा तानिएका थिए। उक्त अडियो सार्वजनिक भएसँगै घटनाको सत्यतथ्य छानबिन गर्न पार्टीभित्र दबाब बढेको थियो।
प्रकरणबारे जवाफ माग्दै रास्वपा केन्द्रीय अनुशासन आयोगले मंगलबार सुनारलाई पत्र पठाएको थियो। आयोगले तोकेको समयभित्रै उनले लिखित प्रतिक्रिया बुझाएका हुन्। आयोगका एक सदस्यका अनुसार सुनारले आफ्नो जवाफमा आरोप स्वीकार गरेका छैनन्। आयोगका ती सदस्यले पीडित पक्षबाट औपचारिक उजुरीसमेत नआएको अवस्थामा आरोपको सत्यता पत्ता लगाउन स्वतन्त्र रूपमा अनुसन्धान अघि बढाइने बताएका छन्। उनका अनुसार लिखित जवाफ प्राप्त भइसकेकाले अब घटनासँग सम्बन्धित प्रमाण र तथ्यहरूको परीक्षणमा आयोग केन्द्रित हुनेछ।
आयोगले प्रकरणको गम्भीरतालाई ध्यानमा राख्दै लिखित स्पष्टीकरणमै अनुसन्धान सीमित नराख्ने निर्णय गरेको छ। आयोगका उपप्रमुख हरिचन्द्र भट्टराईका अनुसार पहिलो चरणमा सांसद सुनारको लिखित प्रतिक्रिया लिने काम पूरा भएको छ भने दोस्रो चरणको अनुसन्धान सुरु भइसकेको छ।
अनुसन्धानका क्रममा विवादित अडियोको वास्तविक स्रोतसम्म पुग्ने, सम्बन्धित कागजात तथा प्रमाण सङ्कलन गर्ने र आवश्यक परे विज्ञको राय लिने तयारी गरिएको छ। अडियोको प्रामाणिकता पुष्टि गर्न आवश्यक परीक्षणसमेत गरिने आयोगले जनाएको छ। उपप्रमुख भट्टराईले विषयवस्तु संवेदनशील रहेकाले अनुसन्धानलाई निष्पक्ष र तथ्यमा आधारित बनाउन विशेष छानबिन समिति गठन गरिएको जानकारी दिएका छन्।
उनका अनुसार समितिले सम्बन्धित सञ्चारमाध्यमसँग पत्राचार गरी अडियो, भिडियो तथा घटनासँग सम्बन्धित अन्य सामग्री उपलब्ध गराउन अनुरोध गर्नेछ। प्राप्त प्रमाणका आधारमा अनुसन्धानलाई थप गहिराइमा लगिने आयोगको भनाइ छ। विवादको निष्पक्ष छानबिन गर्न आयोगले उपप्रमुख भट्टराईकै संयोजकत्वमा विशेष समिति गठन गरेको छ। समितिमा आयोगका सदस्यहरू पनि सहभागी छन्। बिहीबार बसेको आयोगको बैठकले समिति गठन गर्ने निर्णय गरेको भट्टराईले बताएका छन्। समितिले अनुसन्धानका बाँकी काम सम्पन्न गरी आफ्नो रायसहितको प्रतिवेदन केन्द्रीय अनुशासन आयोगसमक्ष पेस गर्ने जिम्मेवारी पाएको छ। अडियो सार्वजनिक गर्ने जनआस्था साप्ताहिकसँग पनि छानबिनका लागि आवश्यक सामग्री उपलब्ध गराउन अनुरोध गर्ने निर्णय बैठकले गरेको आयोगले जनाएको छ।
अब के हुन्छ बाँकी प्रक्रिया ?
सुनारले आरोप अस्वीकार गरेपछि आयोगले अब उपलब्ध प्रमाण, अडियोको प्रामाणिकता र सम्बन्धित पक्षबाट प्राप्त विवरणका आधारमा घटनाको मूल्याङ्कन गर्नेछ। अनुसन्धानका क्रममा आवश्यक देखिए थप कागजात माग्ने, सम्बन्धित व्यक्तिसँग जानकारी लिने र विशेषज्ञको सहयोग लिने बाटो खुला रहनेछ।
विशेष समितिले तयार पार्ने प्रतिवेदनका आधारमा केन्द्रीय अनुशासन आयोगले आगामी निर्णय लिनेछ। हालसम्म सुनारमाथि लगाइएका आरोप अनुसन्धानकै क्रममा रहेकाले छानबिनबाट प्राप्त निष्कर्ष नआएसम्म दोषसम्बन्धी अन्तिम निर्णय भइसकेको अवस्था छैन। रास्वपाले यस प्रकरणमा सत्यतथ्य पत्ता लगाएर आवश्यक निर्णय लिन खोजेको देखिए पनि अनुसन्धानको निष्कर्ष र त्यसपछि चालिने कदमबारे भने आयोगको प्रतिवेदन पर्खनुपर्नेछ।
