काठमाडौँ । कांग्रेसले बिहीबारसम्म क्रियाशील सदस्यताको सूचीलाई अन्तिम रूप दिने भएको छ ।
कांग्रेसले देशभरका सबै जिल्लाको क्रियाशील सदस्यताको सूचीलाई अन्तिम रूप दिएर भदौ पहिलो साताबाट स्थानीय तहको अधिवेशन सुरु गर्ने भएको छ ।
पार्टीको शीर्ष नेतृत्वले सदस्यता टुंगो लगाएपछि स्थानीय तह अधिवेशनको कार्यतालिका सार्वजनिक गरिने भएको छ ।
महाधिवेशन तयारीबारे जानकारी दिँदै पार्टीका मुख्यसचिव कृष्णप्रसाद पौडेलले महाधिवेशनको मतदाता रहेका क्रियाशील सदस्यताको विवाद मिलेपछि अधिवेशन सम्पन्न गर्न सहज हुने बताएका छन् ।
यसअघि बसेको पार्टीको पदाधिकारी तथा पूर्वपदाधिकारीको बैठकले क्रियाशील सदस्यताको विवाद देखिएका जिल्लाको विवाद मिलाउने जिम्मेवारी पार्टीको शीर्ष नेतृत्वलाई दिँदै पार्टी सभापति शेरबहादुर देउवालाई प्रतिवेदन बुझाएको थियो ।
पार्टीमा अब धनुषा, सर्लाही, बारा, सप्तरी, सिन्धुपाल्चोक र रसुवा गरी ६ वटा जिल्लामा क्रियाशील सदस्यताको विवाद समाधान गर्न बाँकी छ । बाँकी सबै जिल्लामा क्रियाशील सदस्यताको विवादको छिनोफानो भइसकेको छ ।
क्रियाशील सदस्यताको विषयमा छलफल गर्न आज कांग्रेस पदाधिकारीको बैठक बस्दैछ । पार्टी सभापति देउवाको बुढानिलकण्ठस्थित निवासमा पदाधिकारी बैठक बस्न लागेको हो ।
