काठमाडौं। एफवान सफ्टको सिस्टम ह्याक गरेर सिटिजन्स बैंकको खातामा रहेको साढे तीन करोड रूपैयाँभन्दा बढी रकम चोरी गर्ने ९ जनालाई धरौटीमा छाड्न आदलतले आदेश दिएको छ । बुधबार काठमाडौं जिल्ला अदालतका न्यायाधीश महेन्द्रबहादुर कार्कीको इजलासले पक्राउ परेका सबै ९ जनालाई धरौटीमा छाड्न आदेश दिएको हो । साइबरको माध्यमबाट रकम ठगी गरेको आरोपमा सिरहाको गोलबजार नगरपालिका–१० का २० वर्षीय राहुल ठाकुर, सोही ठाउँका अर्का १९ वर्षीय पुरुषोत्तम साहलाई जनही ५ लाख धरौटीमा रिहा गर्न अदालतले आदेश दिएको छ ।
उदयपुरको बेलका–५ का २७ वर्षीय दीपक थापा मगरलाई ५० हजार रुपैयाँ धरौटीमा छाड्न आदेश भएको छ । बेलका नगरपालिका–४ का २० वर्षीय कमल थापा मगरलाई भने २ लाख रुपैयाँ धरौटीमा छाड्न आदेश भएको छ । सप्तरीका २१ वर्षीय कृष्ण रमण राउत, सप्तरीकै राजविराज नगरपालिका–७ का ३० वर्षीय सञ्जिवकुमार शर्मा, सुनसरीको धरान उपमहानगरपालिका–८ का २४ वर्षीय सन्देश राई र सुनसरीको देवानगञ्ज गाउँपालिका–५ का २२ वर्षीय सागर कुमार साह र ललितपुरकी ४० वर्षीया त्रिगुण रत्न बज्राचार्यलाई जनही १ लाख रुपैयाँ धरौटीमा छाड्न न्यायाधीश कार्कीले इजलासले आदेश दिएको छ।
सिटिजन्स बैंकको सफ्टवेयर एफवान सफ्टले नै निर्माण गरेको र एफवान सफ्टले नै सिटिजन्स बैंकको दरबारमार्गस्थित शाखामा खाता खोलेको थियो । सफ्टवेयर ह्याक गरेर एफवान सफ्टकै खाताबाट तीन करोड ५१ लाख ५० हजार ३७० रुपैयाँ चोरी भएको हो । सो प्रकरणमा २४ जनालाई प्रतिवादी बनाउँदै काठमाडौं जिल्ला अदालतमा विद्युतीय ठगीको कसुरमा मुद्दा दायर भएको थियो । प्रहरीले नौ जनालाई नियन्त्रणमा लिएको थियो ।
अनुसन्धानबाट ह्याक गरिएको रकम उनीहरुको खातामा ट्रान्फर गरेर त्यहाँबाट विदेश लगिएको खुलेको थियो । ह्याकरको समूहले विदेशमा बसेर ह्याक गर्ने र नेपालीहरुलाई प्रयोग गरेर उक्त रकम विभिन्न माध्यबाट विदेश लाने गरेको अनुसन्धानले देखाएको छ । साइबर ब्यूरो स्रोतका अनुसार अनुसन्धानका क्रममा ह्याकमा युकेको ‘आईपी एड्रेस’ देखिएको छ । यद्यपि, ह्याकरको समूहले अन्य ठाउँहरूबाटै ह्याक गरेर ‘आईपी एड्रेस’ फरक ठाउँका राखेको हुनसक्ने आशंका पनि गरिएको छ । २४ जनाको खातामा रकम ट्रान्सफर गरेपछि त्यहाँबाट दोस्रो लेअरमा करिब ५ सय जनाको बैंक खाता प्रयोग गरिएको खुलेको छ । विभिन्न लेअरमा बसेर ह्याकरको समूहले नेपालीलाई प्रयोग गरेर रकम बाहिर लगेको भेटिएको छ ।
१ अक्टोबर २०२४ देखि ४ अक्टोबर २०२४ सम्म पटकपटक ह्याक गरेर एफ वान सफ्टको खाताको रकम निकालिएको थियो । पक्राउ परेकाहरूले आफ्नो खाता प्रयोग गरे वापत केही रकम बुझेको देखिएको साइबर ब्यूरोले जनाएको छ ।
