काठमाडौं । प्रतिनिधि सभा निर्वाचनको प्रत्यक्षतर्फको मतगणना सम्पन्न भएको छ । सबै १६५ निर्वाचन क्षेत्रको मतगणना सकिएको निर्वाचन आयोगले जनाएको छ ।
धनुषा–१ को मतगणना सम्पन्न भए पनि सो क्षेत्रको मतपरिणामबारे आयोग र अदालतबीचको प्रक्रियाका कारण विवाद भएको थियो । सर्वोच्च अदालतको आदेशपछि आयोगले हालसम्मको मतगणनाअनुसार परिणाम सार्वजनिक गर्दै नेकपाका मातृका यादवलाई विजयी घोषणा गरी प्रमाणपत्र दिएको छ ।
प्रत्यक्षतर्फ राष्ट्रिय स्वतन्त्र पार्टीले अभूतपूर्व जित हासिल गर्दै १२५ सिट जितेको छ । नेपाली कांग्रेसले १८ सिट जितेको छ भने नेकपा एमालेले ९ सिट जितेको छ । त्यसैगरी नेपाल कम्युनिष्ट पार्टीले ८ सिट, श्रम संस्कृति पार्टीले ३ सिट र राष्ट्रिय प्रजातन्त्र पार्टीले १ सिट जितेका छन् । स्वतन्त्र उम्मेदवार महावीर पुन पनि विजयी भएका छन् ।
प्रदेशगत रूपमा हेर्दा २९ निर्वाचन क्षेत्र रहेको कोशी प्रदेशमा रास्वपाले १७ सिट जितेको छ भने एमालेले ५, नेपाली कांग्रेसले ४ र श्रम संस्कृति पार्टीले ३ सिट जितेका छन् । ३२ निर्वाचन क्षेत्र रहेको मधेश प्रदेशमा रास्वपाले ३० सिट जितेको छ भने नेपाली कांग्रेस र नेकपाले एक–एक सिट जितेका छन् ।
३३ निर्वाचन क्षेत्र रहेको बागमती प्रदेशमा रास्वपाले ३१ सिट जितेको छ भने नेपाली कांग्रेस र नेकपाले एक–एक सिट जितेका छन् । १७ सिट रहेको गण्डकी प्रदेशमा रास्वपाले १५ सिट जितेको छ भने नेपाली कांग्रेसले २ सिट जितेको छ ।
२६ सिट रहेको लुम्बिनी प्रदेशमा रास्वपाले २१ सिट जितेको छ भने नेपाली कांग्रेस र नेकपाले २–२ सिट तथा एमालेले १ सिट जितेको छ । १२ सिट रहेको कर्णाली प्रदेशमा नेपाली कांग्रेसले ५ सिट जितेको छ भने नेकपाले ४ सिट, एमाले, राप्रपा र रास्वपाले एक–एक सिट जितेका छन् ।
१६ सिट रहेको सुदूरपश्चिम प्रदेशमा रास्वपाले १० सिट जितेको छ भने एमाले र नेपाली कांग्रेसले ३–३ सिट जितेका छन् ।
यस पटक प्रत्यक्षतर्फ मधेशवादी दल र नागरिक उन्मुक्ति पार्टीले कुनै सिट जित्न सकेनन् । यससँगै उनीहरूको प्रतिनिधिसभामा प्रत्यक्ष प्रतिनिधित्व नहुने भएको छ । अघिल्ला निर्वाचनमा कम्तीमा एक सिट जित्दै आएको नेपाल मजदुर किसान पार्टीको पनि यस पटक प्रतिनिधित्व नहुने भएको छ ।
