काठमाडौं । निर्वाचनअघि बाढीको समस्या समाधान गर्ने स्थानीयवासीलाई प्रतिवद्धता दिएर काठमाडौं क्षेत्र नम्बर ४ बाट नेपाली कांग्रेसका महामन्त्री गगनकुमार थापा तेस्रोपटक प्रतिनिधिसभा सदस्यमा निर्वाचित भए। निर्वाचन परिणामले थापाको व्यक्तिगत राजनीतिक जित त पुष्टि गर्यो, तर उनको कार्यकालको उपलब्धि र जनताका दैनिकीका समस्यामाथि गम्भीर प्रश्न पनि उस्तै छाडिदिएको छ। थापाको भाषणशैली कडा र कार्यान्वयको शैली कम भएको पुष्टि हुँदै आएको सो क्षेत्रमा बसोवास गर्ने स्थानीयहरु बताउँछन् । उनीहरुका अनुसार महामन्त्री थापाले निर्वाचनअघि सो क्षेत्रमा देखिएका सबै समस्या समाधान गर्ने प्रतिबद्धता दिए तर वर्षाको समयमा राती बेडसम्म नै बाढी पुग्छ । वर्षाको समयमा सो सिजन कहिले सकिने हो भन्ने चिन्ता बारम्बार हुने गरेको उनीहरुको भनाइ छ ।
निर्वाचन आयोगको अन्तिम परिणामअनुसार थापाले २१ हजार २ सय ९४ मत प्राप्त गर्दै विजय हासिल गरे थिए । मतान्तर स्पष्ट छ, तर जनअपेक्षा र यथार्थबीचको दूरी अझै गहिरो देखिन्छ। तीन कार्यकालसम्म संघीय संसदमा पुग्दा पनि क्षेत्र नम्बर ४ का नागरिकले भोग्दै आएको सबैभन्दा जटिल समस्या—वर्षायाममा कपनको डुबान—जहाँको त्यहीँ छ। हरेक मनसुनसँगै कपनवासी डुबान, दुर्गन्ध, रोग र विस्थापनको त्रासमा बाँच्न बाध्य छन्। तर तिनै समस्यालाई समाधान गर्ने जिम्मेवारी पाएका जनप्रतिनिधि भने हरेक चुनावमा आश्वासन बाँडेर फेरि जित्दै आएका छन्।
गगन थापा राष्ट्रिय राजनीतिमा सशक्त वक्ता, सुधारवादी नेता र परिवर्तनको प्रतीकका रूपमा प्रस्तुत गरिँदै आएका छन्। तर क्षेत्रीय विकासको हिसाबले हेर्दा, कपनको सडक, ढल, खोला व्यवस्थापन र पूर्वाधार आज पनि वर्षौंदेखि उही अवस्थामा छन्। जनताले प्रश्न गर्न थालेका छन्—के भाषण र सामाजिक सञ्जालमै सीमित विकास नै गगन थापाको राजनीति हो ? तेस्रोपटक जित्दा पनि क्षेत्रका बासिन्दाले बाढी आउँदा घर छोड्नुपर्ने, सवारी अवरुद्ध हुने र सामान्य जनजीवन अस्तव्यस्त हुने नियति बदलिएको छैन। स्थानीयहरू भन्छन्, “नेता जित्दै जान्छन्, तर समस्या हरेक वर्ष दोहोरिन्छ।” कपन मात्रै होइन्, काठमाडौ नै वर्षाको याममा वर्षेनी डुबानमा पर्छ। न त काठमाडौं महामनगरपालिकाका मेयर बालेनन शाहले काठमाडौंवासीको मन चित्न सके न गगनले । काठमाडौं महामनगरपालिकाले खोला खोलेपछि सो नदि आसपासमा बस्ने नागरिकले ठूलो सास्ती भोग्नु परेको छ ।
निर्वाचन जितलाई जनमतको समर्थनका रूपमा मात्र बुझ्नु पर्याप्त हुँदैन। यो जितसँगै आएको जिम्मेवारी अझ गम्भीर हुन्छ। अब प्रश्न केवल चुनाव जित्ने होइन, तीन कार्यकालसम्म नसुल्झिएको कपनको डुबान कहिले समाधान हुन्छ ? यदि यसपटक पनि कपनले हरेक वर्ष पानीसँगै पीडा बोकिरहने हो भने, गगन थापाको तेस्रो जित इतिहासमा उपलब्धिभन्दा आलोचनाको सूचीमा बढी सम्झिइने खतरा छ। जनताले अब भाषण होइन, नतिजा खोजिरहेका छन्।
