काठमाडौं । राष्ट्रिय प्रजातन्त्र पार्टी (राप्रपा)को पदाधिकारी बैठक बस्ने भएको छ । बैठक धूमबाराहीस्थित पार्टी केन्द्रीय कार्यालयमा दिउँसो बस्ने भएको हो। राप्रपाको पछिल्लो समय देखापरेको विवाद समाधानका लागि पदाधिकारी बैठक बोलाइएको पार्टीका नेता सुन्दर पाण्डेले जानकारी दिए।
पार्टीभित्र विकास हुँदै गएको गुट तथा उपगुटको कसरी अन्त्य गर्ने, पार्टीलाई सम्भावित विभाजनबाट कसरी जोगाएर आगामी निर्वाचनमा सफलता कायम गर्ने भन्ने विषयमा छलफल गरिने नेता पाण्डेले बताए।
बैठकमा समसामयिक राजनीतिक घटनाक्रमको समीक्षा साथै देशभर सङ्गठनका राजनीतिक तथा सामाजिक गतिविधि सञ्चालनसम्बन्धी आवश्यक कार्ययोजनामा समेत छलफल हुनेछ। पार्टीमा अध्यक्षसहित निर्वाचित ७ तथा मनोनीत २४ गरी ३१ पदाधिकारी छन्।
गत मङ्सिरमा एकता महाधिवेशनबाट राजेन्द्र लिङ्देनको नेतृत्वमा निर्वाचित नयाँ कार्य समितिले पूर्वाग्रही भएर पदाधिकारी तथा केन्द्रीय सदस्य मनोनीत गरेको, निर्वाचनमा भएको बाह्य हस्तक्षेपको छानबिन गर्न समिति गठन नगरेकोलगायत विषयलाई लिएर असन्तुष्टि व्यक्त गर्दै पूर्वअध्यक्ष कमल थापाले मङ्गलबार पार्टी परित्याग गरेका थिए।
नयाँ राजनीतिक दल स्थापना गर्ने गृहकार्य गरेका थापा समूहका केही नेताले सो राप्रपा परित्याग गर्ने क्रम जारी छ।
