धनगढी । सुदूरपश्चिम प्रदेशका मुख्यमन्त्री खगराज भट्टले स्थानीय स्रोतसाधनको उपयोगबाट प्रदेशको आर्थिक समृद्धि र रोजगारी सिर्जना गर्न सकिने बताएका छन् ।
प्रदेश नीति तथा योजना आयोगले आज धनगढीमा आयोजना गरेको विकास साझेदार संस्थाहरूसँगको अन्तरक्रियामा उनले उपलब्ध स्थानीय स्रोतसाधनको अधिकतम उपयोग गरी आर्थिक उपार्जन र रोजगारी सिर्जना गर्नु प्रदेश सरकारको नीति तथा प्राथमिकता रहेको बताए ।
उनले स्पष्ट विकास लक्ष्य, दृढ इच्छाशक्ति र उपयुक्त दृष्टिकोणका साथ अघि बढे प्रदेशको समृद्धि हासिल गर्न सकिने धारणा राखे ।
मुख्यमन्त्री भट्टले उद्यमशीलता र नवप्रवर्तनसम्बन्धी कार्यक्रम प्रभावकारी रूपमा कार्यान्वयन गर्न विकास साझेदार संस्थाहरूको सहयोग आवश्यक रहेको बताए । विशेषगरी पहाडी क्षेत्रमा बढ्दो बसाइँसराइ रोक्न, विपद्का जोखिम न्यूनीकरण तथा पूर्वतयारी गर्न र स्थानीय स्तरमै रोजगारीका अवसर सिर्जना गर्न ध्यान दिनुपर्ने उनको भनाइ थियो ।
आयोगका अध्यक्षसमेत रहेएका मुख्यमन्त्री भट्टले अर्थतन्त्रको सबलीकरण अहिलेको आवश्यकता भएको उल्लेख गर्दै त्यसबाट मात्रै विद्यमान समस्या समाधान गर्न सकिने बताए । प्रदेश सरकार विकासका गतिविधिमा राष्ट्रिय तथा अन्तरराष्ट्रिय विकास साझेदारसँग सहकार्य र समन्वय गर्न तयार रहेको उनले बताए ।
कार्यक्रममा आयोगका उपाध्यक्ष गोकर्णप्रकाश भट्टले प्रदेश सरकारका विकास प्राथमिकतामा लगानी साझेदारी गर्न विकास साझेदार संस्थाहरूलाई आग्रह गरे । त्यसका लागि आवश्यक नीतिगत, कानुनीलगायतका विषयमा आयोगले सहजीकरण र समन्वय गर्ने उनले बताए ।
कार्यक्रममा आयोगका सदस्य हिरा चन्दसहित प्रदेशका विभिन्न क्षेत्रमा कार्यरत सङ्घसंस्थाका प्रमुख तथा प्रतिनिधिको सहभागिता थियो ।




