काठमाडौं । नेपाल क्रिकेट संघ (क्यान)ले नेपाली राष्ट्रिय क्रिकेट टोलीको एकदिवसीय (ओडीआई) कप्तानमा सन्दीप लामिछानेलाई नियुक्त गरेको छ । क्यानले सोमबार मलेसियामा आयोजना हुने एसीसी प्रिमियर कपका लागि लामिछानेको नेतृत्वमा नेपाली टोली घोषणा गर्दै कप्तानीको जिम्मेवारी उनलाई सुम्पिएको हो । यससँगै रोहित पौडेल ओडीआई टोलीको कप्तानीबाट हटेका छन् । यसअघि नै क्यानले नेपाली टी–२० टोलीको कप्तानीको जिम्मेवारी दीपेन्द्रसिंह ऐरीलाई दिएको थियो । पछिल्लो निर्णयसँगै राष्ट्रिय टोलीको सीमित ओभरको नेतृत्वमा पनि परिवर्तन भएको छ ।
सन्दीप लामिछाने करिब चार वर्षपछि नेपाली राष्ट्रिय टोलीको नेतृत्वमा फर्किएका हुन् । यसअघि उनी कप्तानकै भूमिकामा रहँदा २०७९ सालमा नाबालिग बलात्कारको आरोप लागेपछि क्यानले उनलाई कप्तान पदबाट हटाउँदै राष्ट्रिय टोलीबाट निलम्बन गरेको थियो । पछिल्लो कानुनी प्रक्रियापछि अदालतबाट सफाइ पाएसँगै लामिछाने राष्ट्रिय टोलीमा पुनः फर्किएका थिए । खेलाडीका रूपमा राष्ट्रिय टोलीमा पुनरागमन गरेको केही समयपछि उनलाई पुनः नेतृत्वको जिम्मेवारीसमेत दिइएको हो ।
क्यानको पछिल्लो निर्णयले नेपाली क्रिकेटमा लामिछानेको पुनरागमनलाई नयाँ चरणमा प्रवेश गराएको छ । अब उनको नेतृत्वमा नेपाली टोलीले एसीसी प्रिमियर कपमा प्रतिस्पर्धा गर्नेछ । लामिछाने नेपाली क्रिकेटका प्रमुख लेगस्पिनरमध्ये एक हुन् । अन्तर्राष्ट्रिय फ्रेन्चाइज क्रिकेटमा समेत अनुभव बटुलेका उनले राष्ट्रिय टोलीको नेतृत्वमा फर्किएसँगै मैदानमा प्रदर्शनसँगै टोली व्यवस्थापनको जिम्मेवारीसमेत सम्हाल्नुपर्नेछ । क्यानको यो निर्णयसँगै नेपाली क्रिकेटमा कप्तानी परिवर्तनसँगै आगामी प्रतियोगितामा टोलीको रणनीति र नेतृत्वशैली कस्तो हुनेछ भन्ने चासो बढेको छ ।
