काठमाडौँ । पश्चिम एसियामा उत्पन्न द्वन्द्वपछि हालसम्म ३० हजारभन्दा बढी नेपाली नागरिक स्वदेश फर्किएका छन् । परराष्ट्र मन्त्रालयले शुक्रबार पत्रकार सम्मेलनमार्फत सो जानकारी दिएको हो ।
मन्त्रालयका अनुसार तीमध्ये धेरैजसो कामको सिलसिला वा बिदामा नेपाल फर्किएका हुन् । मध्येएसिया, पश्चिम एसिया तथा अफ्रिका महाशाखाका प्रमुख रामकाजी खड्काका अनुसार कतारबाट मात्रै करिब २१ हजार नेपाली फर्किएका छन् ।
द्वन्द्वपछि परराष्ट्र मन्त्रालयको कन्सुलर सेवा विभागले सञ्चालनमा ल्याएको अनलाइन पोर्टलमा हालसम्म ८७ हजार ८१९ जना नेपालीले आफ्नो अवस्थाबारे विवरण दर्ता गराएका छन् ।
इरानको हर्मुज क्षेत्रमा पक्राउ परेका नेपाली नागरिक अमृत झाको रिहाइका लागि कूटनीतिक पहल भइरहेको मन्त्रालयले जनाएको छ । साथै इरानमा रहेका अन्य नेपालीमध्ये अधिकांश सुरक्षित रहेको पनि जानकारी दिइएको छ ।
प्रवक्ता लोकबहादुर पौडेल क्षेत्रीका अनुसार इरानमा रहेका १० नेपालीमध्ये २ जना स्वदेश फर्कने तयारीमा छन् भने बाँकी ८ जना सुरक्षित अवस्थामा रहेका छन् ।
मन्त्रालयले सम्बन्धित क्षेत्रमा रहेका नेपालीको सुरक्षा र उद्धारका लागि आपतकालीन प्रतिकार्य समूहमार्फत काम भइरहेको जनाएको छ ।
