काठमाडौँ । प्रधानमन्त्री सुशीला कार्कीले संसद भवन परिसरमा जेनजी आन्दोलनका सहिदहरूको सालिक राख्ने विषयमा हालसम्म भएको प्रगतिबारे जानकारी लिएकी छन् ।
बिहीबार सिंहदरबारमा प्रधानमन्त्री कार्कीले सम्बन्धित मन्त्रीहरू तथा निकायका अधिकारीहरूसँग निर्माणाधीन संसद भवन परिसरमा सहिदका सालिक स्थापना गर्ने विषयमा छलफल गरेकी हुन् ।
छलफलमा अर्थमन्त्री रामेश्वर खनाल, गृहमन्त्री ओमप्रकाश अर्याल, खानेपानीमन्त्री मदन परियार तथा सहरी विकास मन्त्री कुमार इङ्नाम सहभागी थिए । यस्तै प्रधानमन्त्रीका मुख्य सल्लाहकार अजयभद्र खनाल, जनसम्पर्क सल्लाहकार गोविन्दनारायण तिमिल्सिना, संघीय संसदका महासचिव पद्मप्रसाद पाण्डे, प्रधानमन्त्री कार्यालयका सचिव गोविन्दबहादुर कार्की, अर्थसचिव घनश्याम उपाध्याय, सहरी विकास सचिव गोपाल सिग्देल र कानुन सचिव पाराश्वर ढुंगाना पनि छलफलमा सहभागी थिए ।
सहरी विकास सचिव सिग्देलले सहिदका सालिक राख्न पहिचान गरिएका स्थानहरू तथा सम्भावित डिजाइनबारे जानकारी गराउँदै आवश्यक सुझाव र निर्देशनका लागि आग्रह गरेका थिए ।
प्रधानमन्त्री कार्कीले यस विषयमा ढिलाइ नगरी संसद भवन निर्माणसम्बन्धी गुरुयोजना संशोधन गरी निर्माण कार्य अघि बढाउन निर्देशन दिएकी छन् ।
सरकारले जेनजी आन्दोलनकारीसँग भएको सम्झौताअनुसार सहिदहरूको त्याग र बलिदानलाई सम्मान, न्याय तथा अर्थपूर्ण स्मृतीकरण गर्ने प्रतिबद्धता व्यक्त गर्दै आएको छ ।
