काठमाडौं।भारतको उत्तर बंगालस्थित दार्जिलिङ र कालिम्पोङका जिल्लाहरू बन्द भएको छ । सिलगुढीको एक स्कुलकी छात्राको हत्याको विरोधमा बन्द गरिएको हो ।
बलात्कार गर्न नदिएको भन्दै १७ वर्षीय बालिकाको हत्या भएपछि विरोधमा धेरै राजनीतिक दलहरूले शनिबार बन्दको आह्वान गरेको हो ।
यस घटनामा प्रान्तीय सरकारको प्रमुख प्रतिपक्षी दल भारतीय जनता पार्टी (भाजपा)ले धेरै जिल्लामा विरोध प्रदर्शनमा सहभागी जनाएको थियो ।
गत सोमबार स्कुलबाट फर्किएकी १७ वर्षीया किशोरीलाई २२ वर्षीय युवकले बलात्कार गर्न खोजेका थिए । पछि सिलगुढीको माटिगारा क्षेत्रको जीर्ण घरमा किशोरीको शव फेला परेको थियो ।
अभियुक्त मोहम्मद अब्बासलाई प्रहरीले पक्राउ गरी अनुसन्धान सुरु गरिसकेको छ । यसैबीच बुधबार आरोपीको घरमा तोडफोड गरी उनका परिवारका सदस्यमाथि पनि कुटपिट भएको छ ।
किशोरीको हत्या घटनाको विरोधमा प्रदर्शनका क्रममा दार्जिलिङ, कालिम्पोङ, कुर्सियोङ, मिरिक र अन्य क्षेत्रहरूमा अधिकांश सवारी साधनहरू सडकमा बन्द थिए ।
पसल र अन्य प्रतिष्ठानहरू पनि बन्द भएको थियो । ठूलो संख्यामा मानिसहरू घरभित्रै बसेका थिए । एजेन्सी
