काठमाडौँ । नेपाली कांग्रेसभित्र विशेष महाधिवेशनलाई लिएर उत्पन्न विवादलाई व्यवस्थापन गर्ने प्रयासस्वरूप पार्टीको कार्यसम्पादन समितिले त्यससम्बन्धी प्रस्ताव फिर्ता लिन औपचारिक अपिल गरेको छ। पार्टी केन्द्रीय कार्यालय सानेपामा बिहीबार साँझ बसेको कार्यसम्पादन समिति बैठकले विशेष महाधिवेशनको पक्षमा देखिएका गतिविधिलाई तत्काल रोक्न आग्रह गर्ने निर्णय गरेको हो। बैठकको उद्देश्य पार्टीभित्र बढ्दै गएको मतभेदलाई थप जटिल हुन नदिनु रहेको नेताहरूले बताएका छन्।
यसअघि महामन्त्रीद्वय गगन थापा र विश्वप्रकाश शर्माले पुस २७ र २८ गते आयोजना गरिएको भनिएको विशेष महाधिवेशनमा सहभागी हुन महाधिवेशन प्रतिनिधिहरूलाई आह्वान गरेका थिए। सो आह्वानसँगै कांग्रेसभित्र तरंग पैदा भएको थियो। बुधबार मात्रै २ हजार ४८८ महाधिवेशन प्रतिनिधिले विशेष महाधिवेशन आह्वान गरिएको घोषणा गरेका थिए। तर, पार्टी केन्द्रीय कार्यालयले त्यसलाई वैधानिक नमान्दै महाधिवेशन प्रतिनिधिहरूलाई त्यस्तो कार्यक्रममा सहभागी नहुन औपचारिक आग्रह गरिसकेको छ।
यही पृष्ठभूमिमा उत्पन्न असमझदारी समाधान गर्न कार्यसम्पादन समिति बैठक बोलाइएको हो। बैठकमा कार्यवाहक सभापति पूर्णबहादुर खड्काले विशेष महाधिवेशनको प्रस्ताव फिर्ता लिनुपर्ने एजेन्डा प्रस्तुत गरेका थिए। बैठकमा सहभागी अधिकांश सदस्यहरूले खड्काको प्रस्तावप्रति सहमति जनाएको एक पदाधिकारीले जानकारी दिए। उनका अनुसार पार्टीलाई थप विवाद र विभाजनतर्फ धकेल्ने कुनै पनि कदम रोक्न आवश्यक रहेको निष्कर्ष बैठकको थियो।
कांग्रेसभित्र देखिएको यो विवादले पार्टीको आन्तरिक लोकतन्त्र, विधानको व्याख्या र नेतृत्वको भूमिकाबारे बहस चर्काएको छ। कार्यसम्पादन समितिको पछिल्लो अपिलले विवाद साम्य हुन्छ वा थप राजनीतिक तनाव निम्त्याउँछ, त्यसको प्रभाव आगामी दिनमा देखिने विश्लेषकहरूको अनुमान छ।
