काठमाडौं । देशको राजनीतिक वातावरण फेरि तनावपूर्ण दिशातर्फ उन्मुख हुँदैछ। नेपाली कांग्रेसको युवा संगठन नेपाल तरुण दल ले सभापति शेरबहादुर देउवामाथि भएको आक्रमणका दोषीलाई कानुनी दायरामा नल्याए सरकारविरुद्ध सडक आन्दोलन सुरु गर्ने चेतावनी दिएको छ।
सोमबार काठमाडौंमा आयोजित नेपाल तरुण दलको ७२औं स्थापना दिवसको अवसरमा अध्यक्ष विद्वान गुरुङले भावनात्मक तर आक्रोशपूर्ण सम्बोधन गर्दै भने, “देश, जनता, संविधान र लोकतन्त्रको रक्षाका लागि दिनरात लडेका सभापति देउवामाथि हत्याको प्रयास गर्नेहरूलाई कारबाही गर्न नसक्ने राज्य रहँदैन। तरुण दलले दोषीलाई कानुनी दायरामा ल्याउनेछ।”
गुरुङले भदौ २४ गतेको जेनजी आन्दोलनका क्रममा बूढानीलकण्ठस्थित देउवाको निवासमा भएको आक्रमणलाई केवल व्यक्तिगत हिंसा होइन, “लोकतन्त्रमाथिको प्रहार” भनेका छन्।
उनले त्यस घटनालाई कांग्रेस र लोकतान्त्रिक शक्तिमाथिको सुँगुरिएको योजनाबद्ध षड्यन्त्रको रूपमा चित्रित गर्दै भने, “२४ गतेको घटनामा हामीले केही गर्न सकेनौं, त्यो कहिल्यै बिर्सने छैनौं। अब त्यस्तो अवस्था दोहोरिन दिने छैनौं।” तरुण दलले उक्त आक्रमणको सत्यतथ्य छानबिन गरेर दोषीमाथि कारबाही गर्न सरकारलाई अल्टिमेटम दिएको छ।
अब चुप लागेर बस्दैनौं’ — सडक संघर्षको तयारी
गुरुङले कार्यकर्तालाई ‘सजग र तयार रहन’ निर्देशन दिँदै भने, “हाम्रो अस्तित्वमाथि हमला भइरहेको छ। अब मौन बस्ने अवस्था छैन। जरुर परे सडकमा भिड्न पनि तयार हुनुपर्छ।” उनका अनुसार, भदौ २३ र २४ गतेको आन्दोलनमा केही विदेशी स्वार्थ समूह, राजावादी शक्तिहरू र सरकारबाहिरका दलहरूले अराजकता फैलाउने काम गरेका थिए। गुरुङले त्यस घटनामा सरकारी संरचना, उद्योगपति र नेताहरूको घरमा पेट्रोल बम प्रहार गरेर क्षति पुर्याउने तत्वहरूको तुरुन्तै पहिचान गरी कानुनी कारबाही गर्न माग गरे। “यदि सरकार उदासीन रह्यो भने हामी सडकमा उत्रिन्छौं। हाम्रा नेतामाथि कारबाही भइरहँदा अब चुप बस्ने प्रश्नै आउँदैन,” उनले चेतावनी दिए।
कांग्रेसभित्र एकताको आग्रह
राजनीतिक अस्थिरता र बढ्दो असन्तुष्टिका बीच अध्यक्ष गुरुङले नेपाली कांग्रेसका शीर्ष नेताहरूलाई एकताको सन्देश पनि दिए। उनले भने,“यो विषम परिस्थितिमा कांग्रेसलाई एक ढिक्का बनाएर अघि बढ्नु अपरिहार्य छ। हामी युवा नेतृत्व त्यसका लागि तयार छौं।” उनका अनुसार, तरुण दलले पार्टीभित्र एकता सुदृढ गर्दै लोकतन्त्र र संविधानको रक्षा गर्ने आन्दोलनलाई नेतृत्व दिन तयार रहेको छ।
राजनीतिक विश्लेषकहरूका अनुसार, तरुण दलको चेतावनी केवल भावनात्मक प्रतिक्रिया मात्र होइन, कांग्रेसको आन्तरिक पुनर्संरचना र जनस्तरमा आफ्नो प्रभाव पुनःस्थापित गर्ने रणनीतिक संकेत पनि हो। तर चुनौती भनेको यही हो — लोकतन्त्रको नाममा आन्दोलन गर्ने दलले आन्दोलनकै हिंसात्मक स्वरूपलाई कसरी नियन्त्रण गर्छ भन्ने। तरुण दलले सभापति देउवामाथिको आक्रमणलाई “जनताको भरोसामाथिको हमला” भनेको छ, र आगामी दिनमा त्यसको “राजनीतिक र कानुनी हिसाब–किताब” गर्ने घोषणा गरेको छ।
नेपालको लोकतान्त्रिक राजनीति फेरि उबलिरहेको छ। तरुण दलका अध्यक्ष विद्वान गुरुङको चेतावनीले स्पष्ट सन्देश दिएको छ — लोकतन्त्रको नाममा आक्रमण गर्नेहरूलाई अब माफ गरिँदैन। अब जिम्मेवारी सरकारको काँधमा छ —दोषीलाई कानुनी दायरामा ल्याउने कि तरुण दलको सडक आन्दोलन सामना गर्ने।
