काठमाडौं । नेकपा एकीकृत समाजवादीका अध्यक्ष माधवकुमार नेपालले अमेरिकी सहयोग परियोजना मिलिनियम च्यालेन्ज कर्पोरेसन (एमसीसी) पारित गर्न नसकिने बताएका छन् ।
शुक्रबार वीरगञ्जस्थित पत्रकार सम्मेलनलाई सम्बोधन गर्दै नेता नेपालले यथास्थितिमा एमसीसी पारित गर्न नहुने बताएका हुन् ।
‘एमसीसीलाई यथास्थितिमा समर्थन गर्न सकिँदैन। जनमत अहिले यसको विरोधमा छ । एमसीसीमा केही मिलाउनुपर्ने कुराहरु छन्। जनतालाई पनि यस विषयमा आश्वस्त पार्न चुनौती छ। यथास्थितिमा आँखा चिम्लेर हामीले एमसीसीको समर्थन गर्न सक्दैनौं,’ नेता नेपालले भने ।
एमसीसी थप छलफल र गहिरो अध्ययन गर्नुपर्ने विषय भएकाले यसलाई अझै पर सार्न सके राम्रो हुने उनले बताएका छन् । साथै एमसीसीको विषयमा भए नभएका कुराहरुको प्रचारप्रसार भइरहेको समेत नेपाले बताए ।
नेकपा एसले एमसीसीका विषयमा विभिन्न सात वटा बुँदामा असहमति जनाएको पनि उनले बताएका छन् ।
नेता नेपालका अनुसार एमसीसीमा उब्जिएका आशंकाहर
- एमसीसी इन्डो–प्यासिफिक रणनीतिको अंग हो कि होइन
यो अमेरिकाको सुरक्षा रणनीतिअन्तर्गत पर्छ कि पर्दैन, सैन्य सम्बन्ध छ कि छैन
एमसीसीको ट्रान्समिसन प्रयोग गर्दा नेपालको तलको भूभागमा नेपालको अधिकार रहन्छ कि रहँदैन
निर्माणको कार्य गर्दा श्रम शक्तिहरु नेपालको प्रयोग गर्न पाउने कि नपाउने
एमसीसी परियोजनाअन्तर्गत भएका विकासका कार्यहरुबाट उत्पादन हुने बौद्धिक सम्पत्तिमा नेपालको अधिकार सुनिश्चित हुन्छ कि हुँदैन,
एमसीसीको लेखापरीक्षण गर्ने हक नेपालका लेखापरीक्षकहरुले प्राप्त गर्छन् कि गर्दैनन्
एमसीसी तथा यससँग जोडिएका कानुनको बारेमा प्रस्ट हुनुपर्ने
