अष्ट्रेलियाली सरकारले देशका दुई बाँकी तेल प्रशोधन कारखानाहरूलाई अनुदान जारी राख्ने समझदारी गरेको ऊर्जामन्त्री क्रिस बोवेनले शुक्रबार घोषणा गर्नुभएको छ।
बोवेनका अनुसार, सरकारले र कारखानाका सञ्चालकहरूले इन्धन सुरक्षा सेवा भुक्तानीमा संशोधन गर्ने सम्झौता गर्नुभयो । यसअन्तर्गत तेलको मूल्य सञ्चालन लागत पुरा नगरेको अवस्थामा सरकारले कारखानाहरूलाई भुक्तानी दिनेछ।
मेलबोर्नको पश्चिम–दक्षिणी क्षेत्र जियालोङमा रहेको भिभा एनर्जीको कारखाना र ब्रिसबेनस्थित एम्पोलको कारखानाले २०२५ मा अष्ट्रेलियाको पेट्रोल, डिजेल र जेट इन्धन आवश्यकताको करिब २० प्रतिशत उत्पादन गरेका थिए।
बोवेनले भुक्तानीको सीमा १.८ सेन्ट प्रति लिटर कायम रहनेछ, तर भुक्तानी सुरु हुने मूल्य स्तर तल झारिने गरी संयन्त्र समायोजन गरिने बताउनुभएको छ।
बदलामा, भिभा र एम्पोलले २०३० दशकसम्म आफ्नो कारखाना सञ्चालन गर्ने योजना अघि बढाइरहेका छन्। बोवेनले थप्नुभयो, “एम्पोलले पूर्ण उत्पादन कायम राख्ने र अन्तर्राष्ट्रिय आपूर्ति श्रृंखलामा दबाब भइरहँदा पूर्वनिर्धारित मर्मत कार्य स्थगित गरेर उत्पादन बढाउने विश्वास जनाएको छ।”
यो घोषणा मध्यपूर्वको द्वन्द्वका कारण विश्वव्यापी तेल आपूर्तिमा ठूलो अवरोध सिर्जना भएको समयमा आएको हो। बोवेनले सरकारले विगत छ महिनादेखि भिभा र एम्पोलसँग वार्ता गर्दै आएको छ र हालको अवस्थामा छोटो अवधिको घरेलु इन्धन आपूर्ति सुनिश्चित गर्न थप कदम चाल्न आवश्यक नभएको बताउनुभयो । तर यदि युद्ध अप्रिल र मेसम्म जारी रह्यो भने आपतकालीन योजना तयार राखिएको छ।
