काठमाडौं । अन्तर्राष्ट्रिय क्रिकेट परिषद (आईसीसी) टी-२० विश्वकपको अन्तिम तयारी स्वरुप नेपालले आज युएईसँग पूर्वतयारी खेल (वार्म अप) खेल्दैछ ।
यो खेल आज साँझ ५.१५ बजेदेखि चेन्नईको एमए चिदाम्बरम स्टेडियममा सुरु हुने नेपाल क्रिकेट संघले जनाएको छ ।
रोहित पाैडेलको कप्तानीमा रहेको नेपालले यसअघि मुम्बईमा एमसीए प्रेसिडेन्ट ११ सँग र श्रीलंकामा श्रीलंका ‘ए’ सँग तीन अभ्यास खेल खेलेको थियो । श्रीलंकासँगको खेलमा नेपालले एउटा खेल जितेको थियो भने एमसीएलाई दुवै खेलमा हराएको थियो ।
नेपालले अर्को वार्म अप खेल क्यानडासँग बिहीबार खेल्नेछ ।
टी-२० विश्वकप फेब्रुअरी ७ (माघ २४) देखि भारत र श्रीलंकामा संयुक्त रूपमा सुरु हुँदैछ ।
नेपालले पहिलो खेल माघ २५ मा इंग्ल्यान्डसँग खेल्नेछ । माघ २९ मा इटली, फागुन २ मा वेस्ट इन्डिज र फागुन ४ मा स्कटल्यान्डसँग खेल्नेछ । नेपालले स्कटल्यान्डको साटो बंगलादेशसँग खेल्ने पूर्व कार्यसूची रहे पनि बंगलादेश भारत नआउने भएपछि स्कटल्यान्डसँग खेल्न लागेको छ ।
उता, पाकिस्तानले पनि भारतीय भूमिमा आएर क्रिकेट नखेल्ने घोषणा गरेपछि आयोजक आइसिसि र भारतले खेद व्यक्त गरेका छन् । उनीहरु पाकिस्तानलाई मनाउन प्रयासरत रहेको बताइन्छ ।
