काठमाडौं ।काठमाडौं महानगरबाट कक्षा ११ र १२ मा यस शैक्षिक सत्रका लागि छात्रवृत्तिमा सिफारिस भएका विद्यार्थीले सम्बन्धित विद्यालय तथा क्याम्पसमा कुनै प्रकारको शुल्क तिर्नु नपर्ने स्पष्ट गरेको छ ।
कतिपय शिक्षालयमा आन्तरिक, प्रयोगशाला र विविध शीर्षकका नाममा शुल्क लिएको तथा स्थान अभावका कारण देखाएर भर्ना लिन आनाकानी गरेको भन्ने गुनासोका सन्दर्भमा महानगरको शिक्षा विभागले सुनुवाइ र सम्बोधन गरेको छ ।
विभागले भदौ १ गते पत्र पठाएर कक्षा ११ र १२ सञ्चालन गरिरहेका निजी (संस्थागत) विद्यालयका सञ्चालनकलाई बोलाएर कुनै छात्रवृत्तिमा सिफारिस भएका विद्यार्थीलाई भर्ना नलिएमा, शुल्क लिएमा वा मानसिक यातना दिए कारबाही गर्ने जनाउ दिइसकेको छ ।
यससँग सम्बन्धित गुनासो सम्बोधन भएको र अझै बाँकी रहेमा महानगरमा सम्पर्क गर्न आग्रह गरिएको छ । महानगरका शिक्षा अधिकारी सीताराम कोइरालाले साउन २० गते छात्रवृत्ति परीक्षामा सम्मिलित भई म्याचिङ प्रणालीबाट अन्तिम योग्यता क्रमको आधारमा पहिलो भर्ना सूचीमा परेका विद्यार्थीलाई यही भदौ ३ गतेसम्म सम्बन्धित शिक्षण संस्थामा भर्ना गरी जानकारी गराउन पत्राचार गरेको थियो ।
