सिन्धुली । सिन्धुलीको दुम्जामा शक्तिशाली प्रेसरकुकर बम विष्फोट भएको छ । सुनकोशी गाउँपालिका–१ दुम्जास्थित नेपाल टेलिकमको टावरमा कुकर बम विष्फोट गराइएको हो ।
बम विष्फोटबाट दुम्जामा रहेको विपी पार्क नजिकै रहेको टेलिकमको टावर तथा घरमा क्षति पुगेको जिल्ला प्रहरी कार्यालय सिन्धुलीले जनाएको छ । उक्त स्थानमा शुक्रबार बिहान बम विष्फोट भएको सिन्धुलीका प्रहरी नायव उपरीक्षक तथा प्रवक्ता चिरन्जिवी दाहालले जानकारी दिए । ‘बिहान करिव ३ बजेको समयमा विष्फोटको आवाज आएपछि स्थानीयले गरेको खबरका आधार घटनास्थल पुगेको प्रहरीले शक्तिशाली प्रेसर कुकर बम विष्फोट भएको पुष्टि गरेको छ,’ उनले भने ।
विष्फोट कसले गराएको भन्ने पुष्टि नभए पनि घटनास्थलमा पिपुल लिब्रेसन आर्मी लेखेको जनमुक्ति सेना लेखेको पर्चा भेटिएको प्रहरीले जनाएको छ । विष्फोट स्थलमा दुईवटा पेट्रोलको बोटल समेत फेला पारिएको प्रहरीले जनाएको छ । उक्त घटनामा संलग्नको खोजी कार्य सुरु गरिएको प्रहरीले जनायो ।
