काठमाडौं । राष्ट्रिय महिला लिग फुटबल प्रतियोगिता अन्तर्गत आज दुई खेल हुँदैछ ।
एन्फा कम्प्लेक्स सातदोबाटोमा हुने पहिलो खेलमा त्रिभुवन आर्मी क्लब र नेपाल पुलिस क्लबबीच प्रतिस्पर्धा हुनेछ ।
आर्मी र पुलिसबीचको खेल अपरान्ह १२ बजे सुरु हुनेछ । यस खेल आर्मीका लागि महत्वपूर्ण रहेको छ ।
दोस्रो स्थानमा रहेको आर्मीलाई उपाधिको सम्भावना कायम राख्न जित्नै पर्ने दवाब छ ।
पुलिसलाई हराएमा आर्मीको उपाधि होड कायम रहनेछ ।
आर्मी पुलिससँग पराजित भए शीर्ष स्थानको एपीएफले दुई खेल अगावै उपाधि जित्नेछ ।
आर्मीले १० खेलमा २५ अंक जोडेको छ । पाँचौं स्थानको पुलिसको १४ अंक रहेको छ ।
त्यस्तै आजको दोस्रो खेलमा शीर्ष स्थानको सशष्त्र प्रहरीको नेपाल एपिएफ क्लब र विराटनगर महानगरपालिकाबीच प्रतिस्पर्धा हुँदैछ ।
एन्फा मैदान सातदोवाटोमा आज दिउँसो ३ बजे हुने यो खेलले लिग विजेताको टुंगो लगाउन सक्नेछ ।
यो खेलमा एपिएफले जित वा बराबरी गरेको अवस्थामा शुक्रबार हुने आर्मी विरुद्धको खेलअघि नैं एपिएफ लिग च्याम्पियन बन्नेछ ।
आज एपिएफ हारेको अवस्थामा भने लिगको छिनोफानो अन्तिम दिनको खेलले गर्नेछ ।
शीर्ष स्थानको एपिएफको १० खेलबाट ३० अंक छ । त्यस्तै विराटनगर ११ खेलमा १६ अंक जोडेर तेस्रो स्थानमा रहेको छ ।
