ब्रिसबेन । टेष्ट च्याम्पियनसीप अन्तर्गत भारतविरुद्धको चौथो तथा निर्णायक टेष्टमा अष्ट्रेलियाले ३ सय २८ रनको लक्ष्य दिएको छ ।
खेलको चौथो दिन चिया सत्रपछि अष्ट्रेलिया २ सय ९४ रनमा अलआउट हुँदै भारतलाई ३ सय २८ रनको विशाल लक्ष्य दिएको हो ।
पहिलो इनिङ्समा ३३ रनको झिनो अग्रता लिएको अष्ट्रेलिया गब्बामा ३२ खेलमा तेस्रो पटक दुवै इनिङ्समा अलआउट भएको हो ।
अष्ट्रेलियाका लागि पूर्वकप्तान स्टेभन स्मिथले सर्वाधिक ५५ रनको योगदान दिए । यस्तै, डेविड वार्नरले ४८, मर्कूृृस ह्यारिसले ३८, क्यामरोन ग्रिनले ३७, प्याट कमिन्सले नटआउट २८, कप्तान टिम पेनले २७ तथा मर्नुस लबुसचेनले २५ रनको पारी खेले ।
भारतका मोहम्मद सिराजले ५, शार्दुल ठाकुरले ४ तथा वासिङ्गटन सुन्दरले एक विकेट लिए ।
अष्ट्रेलियाले पहिलो पारीमा मुर्नस लबुसचेनको शतकीय पारीको मद्धतमा ३ सय ६९ रन बनाएको थियो ।
भारतले पहिलो इनिङ्समा ३ सय ३६ रन बनाउन सकेको थियो ।
दुई टोलीबीचको पहिलो र दोस्रो खेलमा अष्ट्रेलिया र भारत समान ८–८ विकेटले विजयी भएको थियो भने तेस्रो खेल ड्र भएको थियो ।
