काठमाडौं । नेपाल क्रिकेट संघ (क्यान) ले राष्ट्रिय टोलीका क्रिकेटर करण केसीलाई एक खेलका लागि प्रतिबन्ध लगाएको छ। प्रधानमन्त्री कप एकदिवसीय क्रिकेट प्रतियोगितामा नेपाल पुलिस क्लबबाट खेलिरहेका करणमाथि अम्पायरसम्बन्धी सामाजिक सञ्जाल टिप्पणीका कारण अनुशासनात्मक कारबाही गरिएको हो।
क्यानले आइतबार जारी गरेको निर्णयअनुसार करण आगामी एक खेलमा मैदानबाहिर रहनेछन्। साथै उनलाई सो खेलको शतप्रतिशत म्याच शुल्क जरिबाना समेत तिराइने भएको छ। शनिबार करणले सामाजिक सञ्जाल ‘एक्स’ मा “यदि खेलाडी र अम्पायरबीच हातपात भयो भने के हुन्छ ?” भन्ने आशयको टिप्पणी गरेका थिए। क्यानले उक्त अभिव्यक्तिलाई अम्पायरप्रति अनुचित र अनुशासनविपरीत ठहर गर्दै कारबाही गरेको जनाएको छ।
संघले जारी गरेको विज्ञप्तिमा प्रधानमन्त्री कपका खेलहरू जारी रहँदा अम्पायरप्रति सार्वजनिक रूपमा गरिएको यस्तो अभिव्यक्तिले प्रतियोगिताको मर्यादा र खेल अनुशासनमा असर पार्ने उल्लेख गरिएको छ। त्यसैले खेल आचारसंहिताअनुसार कारबाही गरिएको क्यानको भनाइ छ।
हाल करण आबद्ध नेपाल पुलिस क्लब अंक तालिकाको तेस्रो स्थानमा रहेको छ। सात खेलमध्ये चारमा जित, दुईमा हार र एक खेल रद्द हुँदा पुलिसले प्रतिस्पर्धामा मजबुत स्थिति कायम राखेको छ।
