काठमाडौं । नेपाल चेम्बर अफ कमर्सका अध्यक्ष कमलेश अग्रवालले हालको राजनीतिक परिवर्तनले मुलुकमा सकारात्मक सन्देश दिएको बताएका छन्। उनले नयाँ सरकारको गठनसँगै लगानीको वातावरण सुधार हुने र आर्थिक गतिविधि थप गतिशील बन्ने विश्वास व्यक्त गरे। चेम्बरको ७५औँ वर्षगाँठ समारोहमा बोल्दै अध्यक्ष अग्रवालले पछिल्लो राजनीतिक अवस्थाले व्यवसायी तथा लगानीकर्तामा नयाँ आशा जगाएको उल्लेख गरे। निर्वाचनबाट आएको बलियो जनादेशले राजनीतिक स्थायित्व कायम हुने अपेक्षा निजी क्षेत्रले गरेको उनको भनाइ छ।
उनका अनुसार स्थायित्वसँगै सुशासन र स्पष्ट आर्थिक नीतिले देशमा लगानीमैत्री वातावरण बन्नेछ। स्वदेशी तथा विदेशी दुवै लगानीकर्तामा विश्वास बढ्दै गएको र निजी क्षेत्र सरकारसँग सहकार्य गर्दै अघि बढ्न तयार रहेको उनले बताए। नयाँ नेतृत्वले अघि सारेका आर्थिक लक्ष्यहरू—उच्च आर्थिक वृद्धिदर, प्रतिव्यक्ति आय वृद्धि, ऊर्जा उत्पादन विस्तार—ले व्यवसायीहरूलाई थप उत्साहित बनाएको अग्रवालको भनाइ छ। साथै, विज्ञतामा आधारित प्रशासनिक संयन्त्र र साना उद्यमीलाई राहत दिने योजनाले निजी क्षेत्रमा सकारात्मक प्रभाव परेको उनले उल्लेख गरे।
यद्यपि, अन्तर्राष्ट्रिय परिस्थितिले नेपाली अर्थतन्त्रमा चुनौती थपिरहेको उनले औंल्याए। विशेषगरी मध्यपूर्वमा जारी द्वन्द्वका कारण इन्धन आपूर्ति, वैदेशिक रोजगारी, रेमिट्यान्स र पर्यटन क्षेत्रमा असर पर्ने देखिएको उनको भनाइ छ। अग्रवालले यस्तो अवस्थामा ऊर्जा सुरक्षा, आर्थिक आत्मनिर्भरता र वैदेशिक रोजगारीको विविधीकरणमा ध्यान दिनुपर्ने आवश्यकता औंल्याए। उपभोक्तालाई राहत दिन इन्धनमा कर घटाउनुपर्ने तथा दीर्घकालीन रूपमा विद्युतीय सवारी साधनको प्रयोग विस्तार गर्नुपर्नेमा उनले जोड दिए। सरकारले स्पष्ट नीति, स्थिरता र सहकार्यको वातावरण निर्माण गरेमा देशको अर्थतन्त्रले नयाँ गति लिने विश्वास निजी क्षेत्रले लिएको उनले बताए।
