काठमाडौं । सरकारले राजनीतिक कोटामा नियुक्त राजदूतहरूलाई फिर्ता बोलाउने निर्णय गरेको छ।
आइतबार बसेको मन्त्रिपरिषद् बैठकले उनीहरूलाई फिर्ता बोलाउने निर्णय गरेको हो। परराष्ट्र मन्त्रालयले सोमबार राजदूतावासहरूलाई पत्र लेख्दै ६ जना राजदूतलाई फिर्ता बोलाउने निर्णय भएको जानकारी गराएको छ।
फिर्ता बोलाइएका राजदूतहरूमा भारतका लागि डा. शंकरप्रसाद शर्मा, अष्ट्रेलियाका लागि चित्रलेखा यादव, श्रीलंकाका लागि डा. पूर्णबहादुर नेपाली, दक्षिण कोरियाका लागि डा. शिवमाया तुम्बाहाङ्फे, डेनमार्कका लागि सुम्निमा तुलाधर र दक्षिण अफ्रिकाका लागि कपिल श्रेष्ठ रहेका छन्।
उनीहरूलाई एक महिनाभित्र फिर्ता हुन निर्देशन दिइएको छ। उनीहरूलाई केपी शर्मा ओली नेतृत्वको तत्कालीन सरकारले राजनीतिक भागबण्डाका आधारमा नियुक्त गरेको थियो।
यसअघि, पूर्वप्रधानन्यायाधीश सुशीला कार्कीको नेतृत्वमा बनेको गैरदलीय अन्तरिम सरकारले गत असोज ३० गते एकैपटक ११ देशमा कार्यरत नेपाली राजदूतहरूलाई फिर्ता बोलाएको थियो। फिर्ता बोलाइएका ती सबै राजदूतहरू पनि राजनीतिक कोटाबाट नियुक्त भएका थिए।
त्यस क्रममा सरकारले चीनका लागि कृष्णप्रसाद ओली, जर्मनीका लागि शैल रुपाखेती, जापानका लागि दुर्गाबहादुर सुवेदी, इजरायलका लागि धनप्रसाद पण्डित, मलेसियाका लागि नेत्रप्रसाद तिम्सिना, कतारका लागि रमेशचन्द्र पौडेल, रुसका लागि जंगबहादुर चौहान, साउदी अरेबियाका लागि डा. नरेशविक्रम ढकाल, बेलायतका लागि चन्द्रकुमार घिमिरे, अमेरिकाका लागि लोकदर्शन रेग्मी र स्पेनका लागि शनिल नेपाललाई फिर्ता बोलाएको थियो।
