काठमाडौं । नेपाल निर्माण व्यवसायी महासंघको १३औँ अधिवेशनबाट निर्वाचित नयाँ कार्यसमितिले सोमबार पद तथा गोपनीयताको शपथ लिँदै औपचारिक रूपमा जिम्मेवारी सम्हालेको छ। काठमाडौंको अनामनगरस्थित महासंघको केन्द्रीय कार्यालयमा आयोजित समारोहमा नवनिर्वाचित अध्यक्षसहित पदाधिकारी र सदस्यहरूले शपथ ग्रहण गरेका हुन्। महासंघका अनुसार शपथसँगै नयाँ कार्यसमितिले यही दिनदेखि कार्यभारसमेत सम्हाल्नेछ।
नवनिर्वाचित नेतृत्वले महासंघको गरिमा उचो राख्दै निर्माण क्षेत्रको विकास, नीतिगत सुधार तथा व्यवसायीहरूको हकहित संरक्षणमा प्रतिबद्ध भएर काम गर्ने प्रतिवद्धता जनाएको छ। समारोहमा महासंघका पूर्वअध्यक्षहरू, विभिन्न जिल्ला तथा प्रदेशका निर्माण व्यवसायी, साथै सरोकारवाला निकायका प्रतिनिधिहरूको उल्लेख्य उपस्थिति रहेको थियो।
महासंघको अध्यक्षमा निकोलस पाण्डे निर्वाचित भएका छन् भने महासचिवमा शिवहरि घिमिरे चयन भएका छन्।
प्रदेश उपाध्यक्षहरूमा कोशीमा धीरेन्द्र दाहाल, मधेशमा शम्भु ठाकुर, बागमतीमा बालकृष्ण थापा, गण्डकीमा खिमप्रकाश मल्ल, लुम्बिनीमा सहदेव खड्का, कर्णालीमा हिमबहादुर बुढा र सुदूरपश्चिममा प्रकाशबहादुर शेट्टी निर्वाचित भएका छन्।
त्यसैगरी नीतिगत उपमहासचिवमा मंगल शाही, आन्तरिक उपमहासचिवमा सन्तोष साह, महिला उपाध्यक्षमा गंगा पोखरेल, कोषाध्यक्षमा उज्वल गौतम तथा सहकोषाध्यक्षमा उपेन्द्र घिसिङ निर्वाचित भएका छन्। महासंघको नयाँ नेतृत्वबाट निर्माण क्षेत्रका समस्या समाधान, ठेक्का व्यवस्थापन, भुक्तानी प्रक्रिया सहजता र नीतिगत सुधारमा प्रभावकारी भूमिका रहने अपेक्षा गरिएको छ।
