काठमाडौं । वीरगञ्जस्थित कृषि औजार कारखानाले चालु आर्थिक वर्षमा उत्पादन गरेका उपकरण धमाधम बजारमा बिक्री भइरहेको छ। राष्ट्रिय अविष्कार केन्द्रका अध्यक्ष महावीर पुन को नेतृत्वमा सञ्चालन भइरहेको कारखानाले ९ महिनामा करिब १७ लाख रुपैयाँ बराबरको औजार बिक्री गरिसकेको छ।
इन्जिनियर रितेश देव का अनुसार, चालु आर्थिक वर्षको अन्त्यसम्म ५० लाख रुपैयाँ बराबरको बिक्री गर्ने लक्ष्य राखिएको छ। हाल १० प्रकारका औजार उत्पादन भइरहेको छ र ३० भन्दा बढी औजारमा अनुसन्धान पूरा भइसकेको छ। कारखानाले किसानले सजिलै प्रयोग गर्न सक्ने हाते औजारदेखि मकै, धान, गहुँ, उखु र आलु रोप्ने मेसिन, गोडमेल गर्ने उपकरण, काट्ने औजार, हाते ट्याक्टरको ट्रली, केराको रेशाबाट फाइबर निकाल्ने मेसिन निर्माण गर्दै आएको छ।
महावीर पुनले आफ्नो किताब बिक्रीबाट सङ्कलन गरेको करिब २० करोड रुपैयाँको कोषबाट ३ करोड रुपैयाँ कारखानामा लगानी गरेका छन्। इन्जिनियर देवका अनुसार, उत्पादन भएको औजार मुलुकभर बिक्री भइरहेको छ र कोषको खर्च पारदर्शी रूपमा सञ्चालक समितिद्वारा सुनिश्चित गरिएको छ।
कारखानामा हाल ४५ जना प्राविधिक तथा कर्मचारी कार्यरत छन् र मासिक खर्च करिब ६ लाख रुपैयाँ पुगेको छ। २०५९ सालमा बन्द भएको यो कारखाना २०७९ कात्तिकमा राष्ट्रिय अविष्कार केन्द्रले १० वर्षका लागि नेपाल सरकारसँग सम्झौता गरेर सञ्चालनको जिम्मेवारी लिएको हो।
कच्चा पदार्थको अभाव र मूल्य वृद्धिले चुनौती पैदा गरेको भए पनि कारखाना सञ्चालनमा निरन्तरता दिन महावीर पुन र उनका टीमले मेहनत गरिरहेका छन्। प्रतिनिधि सभा निर्वाचनमा म्याग्दीबाट निर्वाचित महावीर पुनको अगुवाइमा पछिल्लो समय म्याग्दीदेखि स्थानीय मतदाताहरू कारखानाको अवलोकन गर्न आएका छन्। रघुगंगा गाउँपालिका–२ का स्थानीय मिलन खत्री र दिलबहादुर केसीले कारखाना सञ्चालन भएको देखेर खुसी व्यक्त गरेका छन्।
कारखानाको सफल सञ्चालनले स्थानीय कृषि व्यवसायमा सहजता र रोजगारी सिर्जना गरेको छ भने स्वदेशी उत्पादनप्रति बढ्दो विश्वासलाई बल प्रदान गरेको छ।
