काठमाडौं । नेपाली उद्योगहरू र बहुराष्ट्रिय कम्पनीबीच देखिएको ट्रेडमार्क विवादले नयाँ मोड लिएको छ। उद्योग विभागले विवादमा तानिएका ११ वटा नेपाली उद्योगलाई सात दिनभित्र अनिवार्य रूपमा लिखित जवाफ दिन निर्देशन दिएको छ।
विभागका अनुसार, विभिन्न अन्तर्राष्ट्रिय ब्रान्डसँग नाम र लोगो मिलेको भन्दै बहुराष्ट्रिय कम्पनीहरूले उजुरी दर्ता गराएका थिए। सोही आधारमा विभागले यसअघि सम्बन्धित उद्योगहरूलाई पत्राचार गरेर स्पष्टीकरण मागेको भए पनि हालसम्म कुनै प्रतिक्रिया प्राप्त हुन सकेको छैन। यसै कारण विभागले सार्वजनिक सूचना जारी गर्दै अन्तिम पटकका लागि सात दिने समयसीमा तोकेको हो। सूचना अनुसार, सम्बन्धित उद्योगहरूले प्रमाणसहित आफ्नो लिखित धारणा पेश गर्नुपर्नेछ।
यदि तोकिएको अवधिभित्र जवाफ नआएमा प्रचलित कानुनअनुसार कारबाही अघि बढाइने स्पष्ट चेतावनी पनि विभागले दिएको छ। साथै, त्यसपछि कुनै गुनासो वा उजुरी सुन्ने अवसर नदिइने जनाइएको छ। सरकारको यो कदमले ट्रेडमार्कसम्बन्धी विवादलाई थप गम्भीर रूपमा लिएको संकेत गरेको छ।
