काठमाडौं । राष्ट्रिय स्वतन्त्र पार्टी का उपसभापति डोलप्रसाद अर्याल ले नवनिर्वाचित सांसदहरूलाई जनताले दिएको ऐतिहासिक अवसरलाई सही ढंगले उपयोग गर्न आग्रह गरेका छन्। अभिमुखीकरण कार्यक्रमको उद्घाटन सत्रलाई सम्बोधन गर्दै उनले वर्तमान समयलाई “इतिहास लेख्ने क्षण” को संज्ञा दिँदै जिम्मेवारीप्रति गम्भीर हुन सांसदहरूलाई सुझाए।
उनले अनुशासित समाज निर्माणलाई प्राथमिकतामा राख्नुपर्ने उल्लेख गर्दै अस्पताल, विद्यालय वा सार्वजनिक सेवामा नेताको सिफारिस खोज्ने प्रवृत्तिको अन्त्य गर्नुपर्ने बताए। “अब सेवा लिन जाँदा नेताको खोजी गर्ने संस्कार अन्त्य हुनुपर्छ,” उनले जोड दिए। अर्यालले कर तिर्नेदेखि सार्वजनिक सेवासम्म पारदर्शिता र इमानदारी आवश्यक रहेको उल्लेख गर्दै भ्रष्ट अभ्यास अन्त्य गर्नुपर्ने धारणा राखे।
उनका अनुसार अहिले बन्ने सरकार र त्यससँग जोडिएको जिम्मेवारी अत्यन्त संवेदनशील छ, जसलाई नयाँ पुस्ताले नजिकबाट मूल्याङ्कन गर्नेछ। त्यसैले सांसदहरूले आफ्नो क्षमता, लगनशीलता र इमानदारी राष्ट्रको हितमा समर्पित गर्नुपर्ने उनको भनाइ छ। यसैबीच, ललितपुरको ग्वार्कोस्थित होटल रोयल टुलिप मा जारी अभिमुखीकरण कार्यक्रममा पार्टी सभापति रवि लामिछाने र वरिष्ठ नेता बालेन्द्र शाह भने उद्घाटन सत्रमा अनुपस्थित रहे।
उपसभापति डीपी अर्याल ले उनीहरूको स्वास्थ्य अवस्था र व्यस्तताका कारण उपस्थित हुन नसकेको जानकारी दिँदै समापनअघि सहभागी गराउने प्रयास भइरहेको बताए। दुई दिनसम्म चल्ने अभिमुखीकरण कार्यक्रममा प्रत्यक्ष तथा समानुपातिक प्रणालीबाट निर्वाचित सांसदहरूको सहभागिता रहेको छ भने समापन सत्रमा सभापति लामिछानेले सम्बोधन गर्ने कार्यतालिका तय गरिएको छ।
