काठमाडौं । सेना दिवसका अवसरमा सैनिक मञ्च टुँडिखेलमा आयोजित परेडमा अमेरिकी सेनाको सहभागिताप्रति नेपाल कम्युनिस्ट पार्टी (माओवादी)ले आपत्ति जनाएको छ। पार्टीका महासचिव विप्लवले सोमबार जारी गरेको विज्ञप्तिमा नेपाली जनता र राजनीतिक दलहरूको सहमति विना विदेशी सेनालाई परेडमा सहभागी गराइनु राष्ट्रिय सार्वभौमिकता र स्वाधीनतामाथि गम्भीर हस्तक्षेप भएको उल्लेख गरेका छन्। उक्त घटनाबारे राज्यको आधिकारिक धारणा सार्वजनिक गर्न पनि उनले माग गरेका छन्।
विज्ञप्तिमा राष्ट्रिय स्वाधीनताको रक्षा सम्पूर्ण नेपाली जनताको साझा दायित्व भएको उल्लेख गर्दै यस्ता गतिविधिले संवेदनशील प्रश्न उठाउने पार्टीको भनाइ छ। यसै विषयमा प्रतिक्रिया दिँदै केपी शर्मा ओलीले टुँडिखेलमा देखिएको दृश्यप्रति असन्तुष्टि व्यक्त गरेका छन्। उनले विदेशी सेनाको सहभागितालाई लिएर आलोचनात्मक टिप्पणी गरेका हुन्।
उता नेपाली सेनाले भने विदेशी सेनाको प्रस्तुति सैनिक कूटनीति तथा आपसी सम्बन्ध विस्तारको परम्परागत अभ्यासअन्तर्गत रहेको स्पष्ट पारेको छ। सेना दिवसका कार्यक्रमहरूमा मित्रराष्ट्रका सेनाबीच सहकार्य र अनुभव आदानप्रदान हुने अभ्यास रहँदै आएको सेनाको भनाइ छ।
