काठमाडौं । सामाजिक सञ्जालमा चुनावी प्रचारसँगै विभिन्न राजनीतिक दलका नेताहरूसम्बन्धी समर्थन र विरोधका दृश्यहरू सार्वजनिक भइरहेका बेला केही भाइरल भिडियोहरूले राष्ट्रिय स्वतन्त्र पार्टी (रास्वपा) नेतृत्वप्रति मतदाताको धारणा कस्तो छ भन्ने विषयमा बहस जन्माएको छ ।
विशेषगरी राष्ट्रिय स्वतन्त्र पार्टी का सभापति रवि लामिछाने र नेता बालेन शाह केन्द्रित चुनावी अभियान सामाजिक सञ्जालमा उच्च उपस्थितिसहित देखिए पनि केही स्थानमा उनीहरूप्रति असन्तुष्टि झल्काउने प्रतिक्रियासमेत सार्वजनिक भएका छन् ।
पोखरा भ्रमणका क्रममा लामिछानेको स्वागतका दृश्यसँगै एक ज्येष्ठ नागरिकले विरोध जनाउँदै नाराबाजी गरेको भिडियो सामाजिक सञ्जालमा व्यापक रूपमा सेयर भएको छ । त्यस्तै, अर्को भिडियोमा एक वृद्ध मतदाताले रास्वपा नेताहरूलाई आफ्नो घरमा मत माग्न नआउन चेतावनी दिएको देखिन्छ ।
यसैगरी, एक महिलाले सामाजिक सञ्जालमा व्यक्त गरेको प्रतिक्रियामा लोकप्रियता र ‘स्टन्ट’ शैलीको राजनीतिभन्दा एजेन्डा र कार्यसम्पादनलाई प्राथमिकता दिनुपर्ने उल्लेख गर्दै मत नदिने धारणा राखेकी छन् ।
अर्को भाइरल दृश्यमा केही ज्येष्ठ महिलाहरूबीचको संवादले पनि ध्यान तानेको छ । उनीहरूले पार्टीको चुनाव चिह्न ‘घण्टी’लाई लिएर व्यंग्यात्मक टिप्पणी गर्दै मतदान नगर्ने प्रतिक्रिया दिएको भिडियो चर्चामा रहेको छ ।
यता, कपिलवस्तुको पकडी क्षेत्रमा भएको चुनावी भेटघाट कार्यक्रममा बालेन शाह जनतासँग पर्याप्त समय नबिताएको भन्दै केही युवाहरूले असन्तुष्टि व्यक्त गरेको भिडियोसमेत सार्वजनिक भएको छ ।
त्यसैगरी तनहुँ क्षेत्र नं. १ मा प्रतिनिधिसभा सदस्य स्वर्णिम वाग्ले विरुद्ध पनि स्थानीय स्तरमा असन्तोष देखिएको दाबी गरिएका सामग्री सामाजिक सञ्जालमा प्रसारित छन् । उपनिर्वाचनपछि क्षेत्रमा पर्याप्त समय नदिएको आरोप लगाउँदै केही मतदाताले आलोचना गरेका दृश्यहरू सार्वजनिक भएका हुन् ।
सामाजिक सञ्जालमा देखिने समर्थन र विरोधका यस्ता मिश्रित प्रतिक्रियाले डिजिटल लोकप्रियता र भौतिक मतदाता धारणा बीचको अन्तरबारे राजनीतिक वृत्तमा थप विश्लेषण हुन थालेको छ । चुनाव नजिकिँदै जाँदा यस्ता सामग्रीले जनमत निर्माणमा कत्तिको प्रभाव पार्छ भन्ने विषय भने आगामी परिणामसँगै स्पष्ट हुने विश्लेषकहरूको भनाइ छ ।
