काठमाडौं । नेपाली कांग्रेसका पूर्वसभापति शेरबहादुर देउवाले सुदूरपश्चिम प्रदेशका मुख्यमन्त्री कमलबहादुर शाहलाई प्रदेश सरकारका तर्फबाट भयरहित वातावरणमा निर्वाचन सम्पन्न गराउन तथा कांग्रेसका उम्मेदवारलाई विजयी बनाउन सक्रिय भूमिका निर्वाह गर्न निर्देशन दिएका छन् ।
बुधबार महाराजगञ्जस्थित आफ्नै निवासमा भएको भेटघाटका क्रममा देउवाले उक्त निर्देशन दिएको मुख्यमन्त्री शाहका प्रेस संयोजक डम्मर बमले जानकारी दिए ।
भेटका अवसरमा देउवाले कांग्रेस लोकतन्त्रमा विश्वास गर्ने पार्टी भएकाले लोकतन्त्रको सुदृढीकरणका लागि निर्वाचनमा सबै नेता–कार्यकर्ता पूर्ण रूपमा समर्पित हुनुपर्ने बताए ।
“स्वच्छ, निष्पक्ष र शान्तिपूर्ण वातावरणमा निर्वाचन सम्पन्न गर्नु अहिलेको अपरिहार्यता हो । त्यसमा कांग्रेसलाई विजय गराउन इमान्दारिताका साथ भूमिका निर्वाह गर्नू,” देउवाको भनाइ उद्धृत गर्दै उनले भने ।
उक्त भेटमा देउवा पत्नी तथा पूर्व परराष्ट्रमन्त्री डा. आरजु राणा देउवासँग पनि मुख्यमन्त्री शाहको भेट भएको थियो । सो अवसरमा देउवा दम्पतीले मुख्यमन्त्री शाहको स्वास्थ्य अवस्थाबारे चासो व्यक्त गरेका थिए ।
