काठमाडौं । आगामी प्रतिनिधिसभा निर्वाचनमा दुई तिहाइ बहुमत हासिल गर्ने महत्वाकांक्षी लक्ष्यसहित नेपाली कांग्रेस औपचारिक रूपमा चुनावी मैदानमा उत्रिएको छ। संगठनलाई अनुशासित, केन्द्रित र परिणाममुखी बनाउने उद्देश्यका साथ पार्टीले निर्वाचन केन्द्रित संरचना र निर्देशिका लागू गरेको छ।
कांग्रेस सभापति गगनकुमार थापाको अध्यक्षतामा बसेको केन्द्रीय कार्यसम्पादन समितिको भर्चुअल बैठकले विधानअनुसार तीन सदस्यीय केन्द्रीय अनुशासन समिति गठन गर्ने निर्णय गरेको छ। केन्द्रीय सदस्य तारामान गुरुङ संयोजक रहने समितिमा धना खतिवडा र सुवासकुमार पोखरेल सदस्य नियुक्त भएका छन्। कार्यवाहक मुख्यसचिव कृष्णप्रसाद दुलालका अनुसार निर्वाचनको मुखमा पार्टीभित्र अनुशासन कायम राख्न समितिलाई सक्रिय भूमिकामा ल्याइएको हो।
बैठकले उपसभापति विश्वप्रकाश शर्माद्वारा प्रस्तुत ‘नेपाली कांग्रेस प्रतिनिधिसभा निर्वाचन परिचालन निर्देशिका–०८२’ र ‘नेपाली कांग्रेस सार्वजनिक कार्यक्रम व्यवस्थापन निर्देशिका–०८२’ लाई परिमार्जनसहित पारित गरेको छ। यी निर्देशिकाले फागुन १ देखि २१ गतेसम्म पार्टीका सबै तहका नेता–कार्यकर्तालाई पूर्ण रूपमा चुनाव केन्द्रित बनाउने स्पष्ट कार्ययोजना अघि सारेका छन्।
निर्देशिकाको मुख्य नारा ‘फागुन २१ का लागि मेरो २१ दिन’ रहेको छ। यसअन्तर्गत “जसको पदीय जिम्मेवारी जहाँ, उसले खट्ने त्यहाँ” भन्ने सिद्धान्त लागू गर्दै केन्द्रदेखि वडा तहसम्मका नेता–कार्यकर्तालाई जिम्मेवारी तोकिएको छ। अन्यत्र जिम्मेवारी नपाएका सबै पदाधिकारी र सदस्यहरूलाई आफ्नै स्थानीय तहमा रहेर मतदाता भेटघाट, संगठन सुदृढीकरण र प्रचार–प्रसारमा सक्रिय रहन निर्देशन दिइएको छ। बैठकमा उपसभापति पुष्पा भुसाल, सहमहामन्त्रीहरू फरमूल्लाह मन्सुर, डा. डिला सङ्ग्रौला, मुक्ताकुमारी यादव, उदयशम्शेर राणा, योगेन्द्र चौधरी तथा प्रवक्ता देवराज चालिसेले आ–आफ्ना धारणा राख्दै निर्वाचनमा एकताबद्ध भएर अघि बढ्नुपर्नेमा जोड दिएका थिए।
यसैबीच, कांग्रेसले सातै प्रदेशका मुख्य सहरहरूमा ठूला सभा आयोजना गर्ने निर्णयसमेत अघि बढाएको छ। त्यसैको निरन्तरतामा मधेस प्रदेशस्तरीय सभा फागुन ६ गते जनकपुरधाममा हुने तय भएको छ, जहाँ सभापति गगनकुमार थापा प्रमुख अतिथिका रूपमा सहभागी हुनेछन्। पार्टीले फागुन २१ गतेको निर्वाचनलाई केन्द्रमा राख्दै संगठन चलायमान बनाउने रणनीति लिएको छ। सभापति थापाले पुसको विशेष महाधिवेशनपछि कांग्रेस “सबैभन्दा नयाँ पार्टी” बनेको दाबी गर्दै बदलिएको कांग्रेसको सन्देश घर–घरमा पुर्याउन कार्यकर्तालाई आह्वान गरेका छन्। विगतका कमजोरी स्वीकार्दै नागरिकको असन्तुष्टि सम्बोधन गर्ने र भागबण्डा तथा भ्रष्टाचारविरुद्ध सशक्त रूपमा उभिने शक्ति कांग्रेस भएको उनको भनाइ छ।
अनुशासन, संगठनात्मक एकता र आक्रामक चुनावी अभियानलाई आधार बनाउँदै कांग्रेसले यसपटक केवल सरकार होइन, बलियो जनादेशसहितको नेतृत्व स्थापित गर्ने लक्ष्यसहित चुनावी प्रतिस्पर्धामा होमिएको संकेत दिएको छ।
