काठमाडौं । नेपाली कांग्रेसभित्र जारी विशेष महाधिवेशनको दिशा र उद्देश्यलाई लिएर बहस चर्किँदै जाँदा, पार्टीका प्रभावशाली नेता डा. चन्द्र भण्डारी र डा. सुनिल शर्मा ले यस महाधिवेशनलाई नेतृत्व चयनको थलो होइन, पार्टी एकता सुदृढ गर्ने मञ्च का रूपमा रूपान्तरण गर्नुपर्ने निष्कर्ष निकालेका छन्। विशेष महाधिवेशनको उद्घाटन सत्रमा सहभागी भइसकेका यी दुई नेताले नेतृत्व चयन प्रक्रियाबाट आफूहरू अलग रहने घोषणा गर्दै नियमित महाधिवेशन भने विधानअनुसार निर्वाचनपछि मात्रै गर्नुपर्ने अडान सार्वजनिक गरेका हुन्। उनीहरूको यो निर्णयले कांग्रेसभित्र बढ्दै गएको शक्ति संघर्ष र विभाजनको खतरा थप उजागर गरेको छ।
भृकुटीमण्डपमा भइरहेका गतिविधिले पार्टीलाई दुई ध्रुवमा बाँड्ने संकेत देखिएपछि भण्डारी र शर्माले नेतृत्व चयन प्रक्रियामा सहभागी नहुने स्पष्ट निर्णय गरेका हुन्। उनीहरूका अनुसार विशेष महाधिवेशनमार्फत नयाँ–नयाँ नेतृत्व निर्माण गर्ने प्रयासले कांग्रेसलाई संस्थागत रूपमा कमजोर बनाउनेछ।
डा. सुनिल शर्माले नेतृत्व चयनकै नाममा समानान्तर शक्ति केन्द्र खडा हुनु कांग्रेसका लागि घातक हुने चेतावनी दिएका छन्। विशेष महाधिवेशन पक्षधरको भावनाप्रति सम्मान जनाउँदै उनले अन्तिमसम्म पार्टी एकताका लागि संवाद जारी राख्ने प्रतिबद्धता जनाए। “दुईवटा नेतृत्व बनाउने बाटो कांग्रेसको भविष्य होइन,” शर्माले भने, “एकतामार्फत नै पार्टीलाई बलियो बनाउन सकिन्छ।” त्यस्तै, डा. चन्द्र भण्डारीले पनि एकपक्षीय रूपमा नेतृत्व घोषणा गर्ने प्रयास विधान, संगठनात्मक मूल्य र दीर्घकालीन राजनीतिक हितविरुद्ध हुने धारणा राखेका छन्। उनका अनुसार नियमित महाधिवेशन नै वैधानिक र स्थायी समाधान हो, जसलाई निर्वाचनपछि मात्रै अघि बढाउनुपर्छ।
विशेष महाधिवेशनलाई लिएर कांग्रेसभित्र देखिएको यो मतभेदले पार्टी गम्भीर मोडमा पुगेको संकेत दिएको छ। एकातर्फ शक्ति संघर्ष तीव्र बन्दै गएको छ भने अर्कोतर्फ एकता जोगाउनुपर्ने दबाब पनि उत्तिकै छ। भण्डारी र शर्माको कदमलाई पार्टीभित्र संयम, संवाद र एकताको पक्षमा गरिएको हस्तक्षेपका रूपमा हेरिएको छ। अब कांग्रेस सामु स्पष्ट प्रश्न उभिएको छ—विशेष महाधिवेशन एकताको आधार बन्छ कि विभाजनको औजार ? यसको उत्तर आगामी दिनमा पार्टी नेतृत्वले लिने निर्णयले तय गर्नेछ।
