काठमाडौं । सहकारी ठगी प्रकरणमा चारवटा अदालतबाट धरौटीमा रिहा भएका रास्वपा सभापति रवि लामिछानेले राजनीतिक सक्रियता बढाइरहेका छन्, तर सहकारी पीडितहरूले अझै आफ्नो बचत रकम फिर्ता पाउने आशा गरिरहेका छन्।
लामिछाने धरौटीमा रिहा भएलगत्तै प्रतिनिधि सभा निर्वाचनको तयारीमा रहेका अन्य राजनीतिक शक्तिसँग गठबन्धन गर्दै वैकल्पिक राजनीतिक शक्ति बन्ने प्रयासमा छन्। तर सहकारी पीडितहरूका अनुसार, राजनीतिक उपलब्धि र गठबन्धनले उनीहरूको आर्थिक क्षति कम गर्दैन। रुपन्देहीका पीडित विजय नेपालले भने, “हामीले राजनीतिक रूपमा संघर्ष गरेका होइनौँ, हाम्रो बचत रकम फिर्ता पाउँ भन्नेतर्फ मात्र ध्यान छ।”
सुप्रिम सहकारीमा झन्डै १ अर्ब रुपैयाँ हिनामिनामा परेको थियो। लामिछानेले व्यक्तिगत रूपमा धरौटी बुझाएर जेलबाट रिहा भए तापनि पीडितहरूको रकम अझै फिर्ता भएको छैन। बुटवल–११ का केशव श्रीस मगरले सरकारको भूमिकाको कमी औँल्याउँदै भने, “रविले कति पनि पदमा पुगुन्, हाम्रो रकम फिर्ता गर्नुपर्छ।”
विशेषज्ञहरूले भन्छन्, लामिछानेको रिहा र राजनीतिक सक्रियता सहकारी मुद्दामा न्यायको ढिलाइको प्रतीक हो। पीडितहरूका अनुसार, अदालतले धरौटी माग्दा पनि रकम असुलीको सुनिश्चितता छैन, जसले तिनीहरूको विश्वासमा कमी ल्याएको छ।
उच्च अदालत बुटवल इजलासले लामिछानेलाई २ करोड ६८ लाख रुपैयाँ धरौटीमा रिहा गर्ने आदेश दिएको थियो। तर मुलुकका नागरिक अभियान्ताले न्यायाधीशको निर्णयमा अनियमितताको आरोप लगाउँदै उजुरी दर्ता गरिसकेका छन्। समीक्षकहरूले लामिछानेको यो शैलीलाई “राजनीतिक फाइदा र व्यक्तिगत संरक्षणमा केन्द्रित अराजकतावादी अभ्यास” भन्दै आलोचना गरेका छन्। उनी अदालतबाट रिहा भएपछि राजनीतिक भूमिकामा सक्रिय भए पनि सहकारी पीडितका वास्तविक सरोकार अझै नजरअन्दाज गरिएको देखिन्छ।
लामिछानेले जहाँतहीँ मुद्दा हाल्ने र व्यक्तिलाई दुःख दिने काम लोकतान्त्रिक चरित्र नभएको बताएका छन् । बुधबार पोखरामा सञ्चारकर्मीहरूसँग कुराकानी गर्दै सभापति लामिछानेले आफूविरुद्ध पूर्ववर्ती सरकारले प्रतिशोध साँधेको भन्दै न्यायलयको मानहानी हुने किसिमको अभिव्यक्ति दिएका छन् । जताततै मुद्दा हाल्ने, कतै पनि झुन्ड्याउने यस्ता चिजहरू लोकतन्त्रले गर्दैन,’ लामिछानेले भने, ‘यो लोकतन्त्रले गरेको होइन।’ लामिछाने सहकारी ठगी सम्बन्धी मुद्दामा तारिख बुझ्नका लागि बुधबार नै पोखरा पुगेका थिए । निर्वाचनमा रास्वपाको क्रेज बढाउन लामिछानेले यस्तो अभिव्यक्ति दिएको बुझिएको छ ।
