काठमाडौं । मधेश प्रदेशका मुख्यमन्त्री कृष्णप्रसाद यादवले प्रदेशसभाबाट सर्वसम्मत रूपमा विश्वासको मत प्राप्त गरेका छन्। आज बसेको प्रदेशसभा बैठकमा सभामा प्रतिनिधित्व गर्ने १० वटै दलका उपस्थित ९२ सांसदले उनलाई समर्थन गरेका हुन्।
सत्तारूढ दलहरू मात्र होइन, प्रमुख प्रतिपक्षी नेकपा एमालेसहित संसदमा रहेका सबै दलले मुख्यमन्त्री यादवको पक्षमा मत दिएका थिए। बैठकको सञ्चालन उपसभामुख बबिता राउत इशरले गरेकी थिइन् र उनले यादवले विश्वासको मत पाएको औपचारिक घोषणा गरिन्।
नेपाली कांग्रेसको नेतृत्वमा बनेको सातदलीय गठबन्धनका घटक दलहरू—जसपा नेपाल, जनमत, नेकपा माओवादी केन्द्र, लोसपा, नेकपा एकीकृत समाजवादी तथा नागरिक उन्मुक्ति पार्टीले यादवलाई समर्थन जनाएका थिए। त्यस्तै, सत्ता बाहिर रहेका राप्रपा नेपाल र नेपाल संघीय समाजवादी पार्टीले पनि विश्वासको मत दिएका छन्।
गत मंसिर १९ गते सातदलीय गठबन्धनको समर्थनमा नेपाली कांग्रेस संसदीय दलका नेता यादव मुख्यमन्त्री नियुक्त भएका थिए। उनले मंसिर २१ गते पद तथा गोपनीयताको शपथ लिँदै प्रारम्भिक चरणमा तीन मन्त्री नियुक्त गरेका थिए। त्यसपछि मंसिर २९ गते मन्त्रिपरिषद् पुनर्गठन गर्दै माओवादी केन्द्र र लोसपालाई सरकारमा सहभागी गराइएको थियो।
हाल मुख्यमन्त्रीसहित ६ सदस्यीय मन्त्रिमण्डल रहेको छ भने अझै ६ मन्त्रालयमा मन्त्री नियुक्त हुन बाँकी छ। विश्वासको मत प्राप्त भएसँगै अब दलहरूबीच भागबण्डा मिलाएर मन्त्रिपरिषद् विस्तार गरिने तयारी छ। १०७ सदस्यीय मधेश प्रदेशसभामा सरकारलाई विश्वासको मतका लागि कम्तीमा ५४ मत आवश्यक पर्छ। प्रदेशसभामा एमालेका २४, कांग्रेसका २२, जसपा नेपालका १८, जनमतका १३, माओवादी केन्द्रका ९, लोसपाका ८ र एकीकृत समाजवादीका ७ सांसद छन्। राप्रपा नेपाल, नागरिक उन्मुक्ति पार्टी र नेपाल संघीय समाजवादी पार्टीको एक–एक सिट छ।
यसअघि पनि मधेश प्रदेशमा मुख्यमन्त्रीहरूले सर्वसम्मत वा बहुमतको विश्वास लिने क्रम देखिँदै आएको छ। दोस्रो कार्यकालका तत्कालीन मुख्यमन्त्री सरोजकुमार यादवले २०८० जेठ २९ गते सिंगो सदनबाट विश्वासको मत पाएका थिए। तर पछिल्ला महिनाहरूमा राजनीतिक अस्थिरताका कारण मुख्यमन्त्रीहरू विश्वासको मत नपाउने आकलनपछि राजीनामा दिने अवस्था समेत देखिएको थियो।
हाल भने मुख्यमन्त्री कृष्णप्रसाद यादवलाई प्राप्त सर्वदलीय समर्थनले मधेश प्रदेशको राजनीतिक अवस्थालाई केही स्थायित्वतर्फ लैजाने अपेक्षा गरिएको छ।
