काठमाडौँ। संघीय संसद्मा सरकारको नीति तथा कार्यक्रममाथि भइरहेको छलफल औपचारिकतामा सीमित भएको देखिएको छ। छलफलमा भाग लिने सांसदहरूको उपस्थिति दुवै सदनमा अत्यन्तै कम देखिएको छ। सांसदहरू आफ्नो धारणा राख्ने र लगत्तै बाहिरिने क्रम बढेकाले नीति कार्यक्रममाथिको छलफल प्रायः खाली सभाहलमा भइरहेको छ।
प्रतिनिधि सभामा नीति कार्यक्रममाथिको पछिल्लो तीन दिनको छलफलको अन्त्यसम्म आइपुग्दा निकै कम सांसद मात्र उपस्थित थिए। कुनै प्रश्न वा प्रस्ताव निर्णयार्थ प्रस्तुत गर्नुपर्ने अवस्थाबाहेक गणपूरक संख्या आवश्यक नपर्ने भएपछि सांसदहरू हाजिर गरेर आफ्नो बोल्ने समय सकिएलगत्तै बाहिरिने गरेको पाइएको छ।
राष्ट्रपति रामचन्द्र पौडेलले वैशाख १९ गते संघीय संसद्को संयुक्त बैठकमा सरकारको नीति तथा कार्यक्रम प्रस्तुत गरेका थिए। यसमा वैशाख २२ गतेदेखि प्रतिनिधि सभामा छलफल सुरु भएको थियो। प्रधानमन्त्री केपी शर्मा ओलीले छलफलको प्रस्ताव गरेपछि प्रमुख विपक्षी दलका नेता पुष्पकमल दाहाल ‘प्रचण्ड’ले छलफलको प्रारम्भ गरेका थिए।
छलफलको सुरुमा नीति कार्यक्रममा संशोधन दर्ता गराएका ३६ जना सांसदले आफ्ना धारणा राखेका थिए। त्यसपछि अन्य १५ सांसदले पनि छलफलमा भाग लिएका थिए। तर पछिल्ला बैठकहरूमा सुरुवाती उपस्थिति केही देखिए पनि छलफल अघि बढ्दै जाँदा सांसदहरूको उपस्थिति निरन्तर घट्दै गएको छ। नीति कार्यक्रमको यो महत्वपूर्ण छलफलमा शीर्ष नेताहरूको उपस्थिति पनि न्यून देखिएको छ भने अन्य सांसदहरू पनि उपस्थित हुने र फर्कने क्रम जारी छ।
प्रतिनिधि सभाको मंगलबारको बैठकमा २०८ सांसदको उपस्थिति दर्ता भएको थियो। तर आकस्मिक, शून्य र विशेष समयपछिको नीति कार्यक्रमको छलफलमा जम्मा २१ सांसदले मात्र भाग लिएका थिए। यसरी नीति कार्यक्रममाथिको छलफल खाली सभाहलमा नै सम्पन्न भएको थियो।
बुधबार पनि न्यून उपस्थितिबीच छलफलको क्रम जारी रह्यो। संसद् सचिवालयका अनुसार बुधबार २१० सांसदको उपस्थिति भए पनि नीति कार्यक्रमको छलफल भने खाली सभाहलमा नै भएको थियो। बुधबारको बैठकमा पनि शीर्ष नेताहरूको पहिलो लहर खाली नै थियो। सत्तापक्ष तथा प्रतिपक्ष दलका अधिकांश शीर्ष नेताहरू अनुपस्थित थिए। आकस्मिक तथा विशेष समयपछि बुधबार २० भन्दा बढी सांसदले नीति कार्यक्रमको छलफलमा भाग लिए पनि समग्रमा उपस्थिति न्यून नै रह्यो। यसरी नीति कार्यक्रममाथिको महत्वपूर्ण छलफलमा सांसदहरूको उदासीनता स्पष्ट रूपमा देखिएको छ।
