काठमाडौं। नेपाली कांग्रेसका सभापति शेरबहादुर देउवाले अपाङ्गता भएका व्यक्तिको अधिकार सुनिश्चित गर्न कांग्रेस प्रतिबद्ध रहेको बताएका छन्। पार्टीको केन्द्रीय कार्यालय सानेपामा आज आयोजित ‘राष्ट्रिय लोकतान्त्रिक अपाङ्ग सङ्घको प्रथम महाधिवेशन’को उद्घाटन गर्दै उनले यस्तो बताएका हुन्।
सभापति देउवाले अपाङ्गता भएका व्यक्तिको हकहितका लागि कांग्रेसले सदैव आवाज उठाउँदै आएको र आगामी दिनमा पनि यसलाई निरन्तरता दिने बताए। उनले अपाङ्गता भएका व्यक्तिलाई समाजमा समान अवसर प्रदान गर्न सबैले हातेमालो गर्नुपर्नेमा जोड दिए।
महाधिवेशनमा देशभरबाट अपाङ्गता भएका व्यक्तिको प्रतिनिधित्व रहेको छ। उनीहरूले अपाङ्गता भएका व्यक्तिको अधिकार, शिक्षा, स्वास्थ्य, रोजगारी र सामाजिक सुरक्षाका विषयमा छलफल गर्नेछन्।
कार्यक्रममा कांग्रेसका अन्य नेताहरूले पनि अपाङ्गता भएका व्यक्तिको अधिकार सुनिश्चित गर्न पार्टीले आवश्यक नीति तथा कार्यक्रम ल्याउने प्रतिबद्धता व्यक्त गरेका थिए।
