नवलपुर। लगातारको वर्षाका कारण नारायणी नदीमा पानीको बहाव उच्च भएपछि गण्डक ब्यारेजका सबै ढोका खोलिएको छ ।
संरचना पुरानो भएकाले गण्डक ब्यारेजमा तीन लाख क्युसेक पानीको प्रवाह हुँदा खतराको सूचक मानिन्छ । केही बेरअघि ब्यारेजमा ३ लाख ६५ हजार क्युसेक पानीको प्रवाह मापन गरिएको छ ।
पानीको बहाव उच्च भएपछि ब्यारेजका सबै ३६ वटै ढोका खोलिएको नवलपुरका प्रमुख जिल्ला अधिकारी अरुण पोख्रेलले जानकारी दिए । लगातार वर्षा भइरहेकाले पानीको सतह अझै बढ्दै जाने अनुमान गरिएको छ ।
बिहान ६ बजे पानीको बहाल ३ लाख २१ हजार क्युसेक मापन गरिएको गण्डक ब्यारेजका भुआर्जन अधिकृत काशिनाथ हरिजनले जानकारी दिए । नारायणी नदीले देवघाटमा खतराको सतह पार गरेपछि ब्यारेजमा पानीको सतह थप बढ्ने बताइएको छ ।
