काठमाडौं । राष्ट्रिय स्वतन्त्र पार्टीका सभापति रवि लामिछानेले गम्भीर विषयमा एक मिनेटमा प्रश्न सोध्ने समय कम भएको भन्दै आपत्ति जनाएका छन् ।
सोमबारको प्रतिनिधिसभा बैठकमा आवश्यक समय लिएर बोल्दै उनले गम्भीर विषयमा एक मिनेटमा प्रश्न सोध्ने समय कम भयो भन्दै सभामुखको ध्यानाकर्षण गराएका थिए ।
‘प्रतिनिधिसभा सत्ता पक्षको होइन, प्रतिपक्षको हो । तर गम्भीर विषयमा प्रश्न सोध्ने समय एक मिनेट बनाइएको छ । यो के मजाक हो ? किन सांसदलाई धेरै समय दिइँदैन,’ लामिछानेले भने ।
प्रतिनिधिसभाको नियमित कामकारबाही सुरु हुनुअघि सभामुखले आकस्मिक र शून्य समय लिएर सांसदलाई एक एक मिनेटमा समसामयिक विषयमा सरकारलाई प्रश्न सोध्ने समय निर्धारण गरेका छन् ।
संसदको नियमावली बनाउने बेला नै समय निर्धारण गरिएको हुन्छ । प्रतिनिधिसभाको नियमावली सबै दलका प्रमुख सचतेकसँगको लामो छलफलपछि सभामुखले बनाउने गरेका छन् ।
प्रतिनिधिसभाको नियमावली बनाउने बेला नै रवि लामिछानेहरूले समय बढाउन माग गरेको वा प्रस्ताव गरेको अहिलेसम्म सुनिएको छैन । तर आजको संसद् बैठकमा भने लामिछानेले समय कम भो र सदनलाई मजाक गर्ने स्थल बनाइएको भन्दै आक्रोश व्यक्त गरे ।
