आजका पत्रपत्रिकामा भारतमा ४० वर्ष विना सुनुवाई जेल बसेका दुर्गा प्रसाद तिम्सिना नेपाल फर्किएर पारिवारिक मिलन गरेको तस्वीरसहितका समाचार छन् भने अन्य राजनितिक विषयवस्तुले पनि स्थान पाएका छन् ।
दुर्गाप्रसादको परिवारको तस्वीर छापेको नागरिक दैनिकले ओली आतंक शिर्षकमा मुख्य खबर छापेको छ । सत्ता टिकाउन ओलीले सांसदलाई कारबाहीको धम्की दिएको समाचारमा उल्लेख छ । सोही समाचार भित्र नेता नेपाललाई एक्ल्याउने रणनिति शिर्षकमा समाचार छ । एमाले अध्यक्ष एवम् प्रधानमन्त्री केपी शर्मा ओलीले वरिष्ठ नेता माधवकुमार नेपाललाई जसरी पनि एक्लो बनाउने नीति लिएका छन् । पार्टीभित्र आफू शक्तिशाली बन्दै गएपछि ओलीले नेपालसहित चार नेतालाई कारवाही गर्ने र उनीसँग निकट रहेका अन्य नेतालाई आफ्नो पक्षमा आउन बाध्य पार्ने नीति लिएका हुन् ।
भारतमा संक्रमण तीव्र, नेपालमा उच्च जोखिम शिर्षकमा अर्को खबर छ । छिमेकी मुलुक भारतमा दोस्रो चरणको संक्रमण फैलिएपछि नेपालमा पनि जोखिम बढेको सरोकारवालाहरूले औँल्याएका छन् । आइतबार भारतबाट नेपाल आएका व्यक्तिमा कोरोनासंक्रमण पुष्टि भएको राष्ट्रिय इपिडिमियोलोजी तथा रोग नियन्त्रण महाशाखाले जनाएको छ । महाशाखा प्रमुख डा. कृष्ण पौडेलका अनुसार पश्चिम नाकाबाट नेपाल प्रवेश गरेका एक नेपालीमा एन्टिजेन परीक्षण गर्दा संक्रमण पुष्टि भएको हो ।
राजधानी दैनिकले राजनीतिक खिचातानीले थलिँदै लोकसेवा आयोग,लोक सेवा आयोगका सबै काम ठप्प, परीक्षा र नतिजा रोकिने शिर्षकमा मुख्य खबर छ ।
प्रधानमन्त्रीको अध्यक्षतामा रहने संवैधानिक परिषद्ले समयमा नै पदाधिकारी सिफारिस र नियुक्ति गर्न नसक्दा लोकसेवा आयोग एकैपटक पदाधिकारीविहीन बन्ने भएको छ । बढ्दो राजनीतिक खिचातानीका कारण प्रधानमन्त्री केपी शर्मा ओलीले संवैधानिक परिषद्को बैठक बोलाउन सकेका छैनन् । जसका कारण लोकसेवा आयोगको पदाधिकारी सिफारिस र नियुक्ति प्रक्रिया अवरुद्ध बनेको छ ।
आयोगका अध्यक्षलगायत पाँचै जना पदाधिकारीको पदावधि यही १० चैत्रदेखि सकिँदै छ । पदाधिकारी समयमा सिmफारिस र नियुक्ति हुन नसक्दा आगामी ११ चैत्रदेखि लोकसेवा आयोगका सबै काम ठप्प हुनेछन् । आयोगद्वारा सञ्चालन हुने परीक्षा तथा नतिजाका सबै काम रोकिनेछन् । यस्तै, सरकारी निकायमा रिक्त रहने स्थानमा नयाँ कर्मचारी पदपूर्ति गर्ने प्रक्रियासमेत अवरुद्ध बन्नेछ ।
