काठमाडौं। प्रमुख प्रतिपक्षी दल नेपाली कांग्रेसले आजको परिस्थितिमा प्रधानमन्त्री केपी शर्मा ओलीको दायित्व एकातर्फ, ब्यवहार अर्कातर्फ हुनु देशका लागि दुर्भाग्यपूर्ण भएको बताएको छ । कांग्रेस प्रवक्ता विश्वप्रकाश शर्माले बुधवार एक विज्ञप्ती जारी गर्दै पछिल्लो समय देशमा देखिएको विविध परिदृश्यमा प्रधानमन्त्री ओलीका अभिव्यक्तिहरुले केही गम्भीर प्रश्न सृजना गरेको बताएका छन । प्रवक्ता शर्माको प्रश्न छ- देशको प्रधानमन्त्रीका अभिव्यक्तिहरुले नेपाल देश र सम्बन्धित दलको प्रतिनिधित्व गर्दैनन् भने प्रधानमन्त्री पद ब्यक्तिको जमिन्दारी कि देशको जिम्मेवारी ?
बाढी–पहिरोमा कयौंको मृत्युु भएको बेला देशको प्रधानमन्त्रीको दायित्व समवेदना वक्तव्य दिएरमात्र पुरा नहुने भन्दै कांग्रेसले खवरदारी गरेको छ । कयौंको मृत्यु र हजारौं संक्रमित भएको विवरण बहिखातामा सारेर बसेरमात्र दायित्व पुरा नहुने भन्दै युद्धस्तरमा तयारी गर्न आग्रग गरेको छ । नक्सा अनुरुपको जमिनमा हक स्थापित गर्न गम्भीर कुटनैतिक पहलकदमी भन्दा अयोध्याबारे विवादास्पद अपरिपक्व टिप्पणी मार्फत प्रधानमन्त्रीले संवेदनशील बिषयमा असंवेदनशील ब्यवहार प्रस्तुत गरेको कांग्रेसको आरोप छ ।
प्रवक्ता शर्माद्वारा जारी विज्ञप्तीमा भनिएको छ प्रधानमन्त्री पद देशको संस्कार, संविधान र संवेदनशीलता भन्दा पर ब्यक्तिगत सनकको कैदी बन्न मिल्दैन । संस्थागत जिम्मेवारी भन्दा अलग निर्दलिय आधिपत्य प्रधानमन्त्री पदमा संविधानले परिकल्पना गरेको छैन । अतः प्रधानमन्त्रीको सोच, शैली, अभिव्यक्ति र ब्यवहार सम्पूर्ण रुपले बदल्ने या प्रधानमन्त्रीनै बदल्ने, उहाँकै दल नेकपाको बिषय हो । तर दुई प्रश्न, देशको प्रधानमन्त्रीको अभिव्यक्ति नेपाल सरकारकै संस्थागत अभिव्यक्ति हो कि होइन ? अनि उहाँको दल नेकपा पार्टीको विश्वास बमोजिमको हो होइन ? संस्थागत प्रस्टीकरण अनिवार्यसंग आवश्यक भएको छ ।
प्रतिपक्षी दल नेपाली कांग्रेसका तर्फबाट प्रधानमन्त्रीका पछिल्ला अभिव्यक्ति र ब्यवहारप्रति गम्भीर विमति प्रकट गर्दै यसबारे सरकार र नेकपाको संस्थागत धारणा सार्वजनिक गर्न माग गरेको छ ।
