काठमाडौं । नेपाली सेनाका उपरथी प्रभुराम शर्मालाई रथि पदमा बढुवा सिफारिस गरिएको छ । सैनिक मुख्यालयले शर्मालाई रथी पदमा बढुवा लागी नाम सिफारीस गरेको हो । हालका बलाध्यक्षरथी गौरव टण्डुलको ठाउंमा सैनिक मुख्यालयले उपरथी शर्माको नाम सिफारीस गरेको सैनिक स्रोतले जनाएको छ ।
रथी तण्डुल उमेर हदका कारण यही वैशाख १९ मा अवकास पाउंदैछन् । तण्डुल बिहिवारदेखि विदामा बसेका छन् । सेनामा अवकासमा जानु १५ दिन अघि विदामा बस्ने प्रचलन छ । बलाध्यक्षकृतरथी शरद गिरीको अध्यक्षतामा बसेको बोर्ड बैठकले गत साता शर्माको नाम सिफारीस गर्दै सात दिने सुचना समेत प्रकाशित गरेको हो । बलाध्यक्षरथी तण्डुलले प्रधानसेनापति पुर्णचन्द्र थापासहित उच्च अधिकारीसंग भेटेर बिदामा बस्न लागेको जानकारी समेत दिएका थिए । उपरथी शर्मा हाल सम्भाररथी विभागको प्रमुख छन् ।
सरकारले यसअघि उनी सेनाको युद्धकार्य महानिर्देशक रहेका बेला १ वर्ष २ महिना १५ दिनका लागी पदावधी थप गरेको थियो । शर्मा रथीमा बढुवा भएसंगै उनको हालका प्रधानसेनापति पूर्णचन्द्र थापाको अवकासपछि प्रधानसेनापति बन्ने बाटो खुला भएको छ । सेनामा व्यवसायिक सैनिक अधिकृतको छवि बनाएका शर्माले भारतबाट नेशनल डिफेन्स कोर्स (एनडिसी) गरेका छन् ।
हालका प्रधानसेनापति थापाले २०७८ भदौ २४ मा अनिवार्य अवकास पाएसंगै शर्मा उनको ठाउंमा नेपाली सेनाको प्रधानसेनापति बन्नेछन् । शर्मा रथी बनिसकेपछि उनको रथीको दुई वर्षे पदावधी २०७८ पुष सम्म कायम रहनेछ । सेनामा दुई जना रथीको दरबन्दी रहेको छ । अर्का रथी शरद गिरीले पनि आगामी असार ०६ गते अनिवार्य अवकास पाउनेछन् । उनको ठाउंमा वरियताका आधारमा उपरथी ईश्वर हमाल वा राजेन्द्र कार्की रथीमा बढुवा हुनेछन् ।
