काठमाडौं। स्थानीय तहको निर्वाचनमा देशभरका ६ महानगरपालिकामध्ये ४ वटामा उपमेयर जितेको नेकपा एमालेले सबै निर्वाचित उपमेयरलाई आगामी केन्द्रीय सदस्य निर्वाचनका लागि उम्मेदवार बनाएको छ।
एमाले अध्यक्ष केपी शर्मा ओलीको प्यानलबाट चारै महानगरपालिकाका उपमेयरले उम्मेदवारी घोषणा गर्दा तीनजनाका लागि यो पहिलोपटक हो। पोखरा महानगरपालिकाकी मञ्जु गुरुङ दोस्रोपटक केन्द्रीय सदस्यको उम्मेदवार बनेकी छिन्।
त्यस्तै, काठमाडौं महानगरपालिकाकी सुनिता डंगोल, ललितपुरकी मञ्जली शाक्य बज्राचार्य र विराटनगरकी शिल्पा कार्की निराला पहिलोपटक केन्द्रीय सदस्यको उम्मेदवार बनेका हुन्। सुनिता हाल केन्द्रीय स्थानीय विभागकी सदस्य हुन् भने मञ्जली ललितपुर जिल्ला कमिटी उपसचिव हुन्।
विशेष जानकारीअनुसार, शिल्पा कार्की पहिले मोरङको अधिवेशनमा उपसचिव पदका लागि उम्मेदवार बनेर पराजित भएकी थिइन्।
यसैसँग एमालेले आगामी निर्वाचनमा महिला, नयाँ नेतृत्व र अनुभवलाई सन्तुलित गर्ने रणनीतिसहित आफ्नो प्यानल तयार पारेको छ।
