काठमाडौं । नेकपा (एमाले) को ११औँ महाधिवेशन अन्तर्गत आज हुने बन्दसत्रका लागि भृकुटीमण्डपमा कडा सुरक्षा व्यवस्था मिलाइएको छ। दोस्रो दिनको मुख्य कार्यक्रमका रूपमा बन्दसत्र तय भए पनि केही प्राविधिक तयारीका कारण निर्धारित समयभन्दा ढिलो सुरु हुने भएको छ।
पार्टी उपमहासचिव प्रदीप ज्ञवालीका अनुसार बिहान ८ बजेका लागि तय गरिएको बन्दसत्र केन्द्रीय समिति बैठकका कारण केही समयपछि मात्र सुरु हुनेछ। उनका अनुसार आवश्यक व्यवस्थापन तथा प्राविधिक तयारी अन्तिम चरणमा रहेकाले समय तालिकामा सामान्य ढिलाइ हुन लागेको हो।
बन्दसत्रलाई लक्षित गर्दै नेपाल प्रहरीले दुई सयभन्दा बढी सुरक्षाकर्मी परिचालन गरेको छ। त्यससँगै एमालेले आफ्नै स्वयंसेवक दस्ता पनि खटाएको छ। सुरक्षालाई प्राथमिकतामा राख्दै भृकुटीमण्डप परिसरको चारै दिशाबाट सर्वसाधारणको आवतजावत निषेध गरिएको छ। महाधिवेशनमा सहभागी प्रतिनिधि बाहेक अन्य व्यक्तिलाई स्थलभित्र प्रवेश गर्न नदिने कडाइ गरिएको छ।
यद्यपि महाधिवेशनका कारण काठमाडौंका मुख्य सडकहरू प्रभावित नहुने बताइएको छ। उपत्यका ट्राफिक प्रहरी प्रमुख एसएसपी नवराज अधिकारीका अनुसार भृकुटीमण्डप प्रवेश बाहेक अन्य कुनै सडकमा अवरोध छैन। महाधिवेशनमा सहभागी सवारीसाधन पार्किङका लागि टुँडिखेलमा विशेष व्यवस्था मिलाइएको उनले जानकारी दिए।
नेताहरूको आवागमन र प्रतिनिधिहरूको चहलपहल बढेसँगै भृकुटीमण्डप राजनीतिक गतिविधिको केन्द्र बनेको छ। बन्दसत्रमार्फत नेतृत्व चयन, राजनीतिक प्रस्ताव र सांगठनिक निर्णयमा केन्द्रित छलफल हुने अपेक्षा गरिएको छ।
